«Բեսթ Ֆրութ»-ի սեփականատերը ընտրություններում պարտվել էր Միքայել Վարդանյանին

Արդեն անդրադարձել էինք հարցին, որ «Սպայկա» ընկերությանը եկել է փոխարինելու մի նոր կազմակերպություն՝ «Բեսթ Ֆրութ Լոգիստիկս Ցենտր»-ը:

Ինչքան էլ խոսվում է, որ «Բեսթ Ֆրութ»-ը կարող է «Սպայկա»-ի բացը լրացնել, գյուղատնտեսական մթերքն էլ սեզոնին չթողնել այգիներում, բայց ակնհայտ է, որ դա անհնար է: «Բեսթ Ֆրութ»-ը դեռևս չկազմավորված, շինարարական աշխատանքները չավարտած, սառնարաններով չհագեցած և մի քանի մեքենաներ ունեցող կազմակերպություն է, որի մուտքն, իհարկե, կարևոր է մենաշնորհի վերացման հարցում, բայց նաև վտանգավոր է՝ գյուղացուն փաստի առաջ կանգնեցնելու առումով:

Ի դեպ, «Բեսթ Ֆրութ»-ի սեփականատերը գործարար Արման Ամիրաղյանը, ով Արման ՕԻԼ-ի սեփականատերն է և զբաղվում է մեքենաների յուղերի ներկրմամբ, ունի նաև ռեստորան, հասցրել է մասնակցել պատգամավորական ընտրություններին:

Ըստ ԿԸՀ տվյալների՝ Արման Ամիրաղյանը 2007 թվականին իր թեկնածություն է դրել թիվ 40 ընտրատարածքում՝ Տավուշի մարզ և ֆեն ու արդուկ, գինի ու «բոմբոներկա» բաժանելով՝ հավաքել 14783 քվե, իր հետ հիմնական մրցակիցը եղել են գործարար Վարդանյան եղբայրներից Միքայելը, ով մի քանի հարյուր ձայնով առաջ էր անցել Արման Ամիրաղյանից՝ հավաքելով 15496 ձայն:

Հետաքրքրական է, որ «Բեսթ Ֆրութ»-ի մասին տեղեկությունների տարածմամբ զբաղվում է իշխանական թևը, սակայն ՊԵԿ նախագահն այդպես էլ չճանաչեց այդ ընկերությանը:

«Առաջին անգամ եմ լսում այս ընկերության մասին: «Սպայկա»-ի ղեկավարության արարքների քրեաիրավական գնահատական տալու քննություն ենք իրականացնում: Եթե տնտեսագիտական կողմը նայենք, ապա մենք որպես կառավարություն ամեն ինչ անելու ենք, որ «Սպայկա»-ն որպես տնտեսավարող սուբյեկտ իր գործունեությունը շարունակի: Բայց այստեղ դիլեմայի առաջ ենք մենք կանգնած, մենք չենք ուզում, որ «Սպայկա»-ի գործունեությունը խաթարվի, բայց գործունեությունը չխաթարվելու նախապայման որպես ընդունելը, որ նաև քրեաիրավական գնահատական չպետք է տանք նախկին ղեկավարության վարքագծին, մենք պատրաստ չենք այդպիսի կոմպրոմիսի»,- կառավարության նիստից հետո ասել էր Անանյանը:

Ինչևէ, փաստն այն է, որ «Սպայկա»-ն կապ ուներ նախկին իշխանությունների հետ, իսկ Փաշինյանի խանդն այնքան զորեղ էր, որ անգամ այն ազդում է տնտեսության թույլ օղակների վրա՝ խեղդելով «Սպայկա»-ին՝ շունչ է տալիս «Բեսթ Ֆրութ»-ին:

NEWSPRESS.am