«Իմ գործով դատավորն այս փուլում պետք է հերոս լինի, որպեսզի օբյեկտիվ որոշում կայացնի»․ Քոչարյան (տեսանյութ)

«Քոչարյանի գործի հետ կապված բոլոր պատվերներն արդեն իսկ սկսել ենք իմանալ՝ որտեղից են գալիս, ինչ խողովակներով»։ Այս մասին այսօր լրագրողների հետ զրույցում ասաց ՀՀ երկրորդ նախագահ Ռոբերտ Քոչարյանի պաշտպան Հայկ Ալումյանը:

Նա խոստացավ այդ մասին հայտնել, երբ կգա ժամանակը, իսկ առայժմ դատավորներին պատվերներ տվողների անունները չի կարող ասել։

«Կգա ժամանակը, կներկայացնենք ամեն ինչ, թե ինչպես են դատավորների վրա ճնշումներ գործադրում։ Այդ անունները կարող են շատերին անակնկալի բերել»,-ասաց պաշտպանը:

Նա փոխանցեց Ռոբերտ Քոչարյանի խոսքը․ «Քոչարյանն ասել է, որ չի սպասում, որ այս փուլում իր դեմ հարուցված գործով արդար որոշում կկայացվի»,-ասաց Ալումյանը։ Նրա դիտարկմամբ, այն, ինչ կատարվում է հիմա Քոչարյանի դատական գործի շրջանակներում, իրավական անհեթեթության կուլմինացիա է:

«Պարոն Քոչարյանն ասաց, որ գործով դատավորն այս փուլում պետք է հերոս լինի, որպեսզի օբյեկտիվ որոշում կայացնի»,-ընդգծեց պաշտպանը։