Մենամարտը սկսված է

Օրերս հրավիրված մամուլի ասուլիսի ժամանակ Կոռնիձորի Արոն՝ Արա Խուդավերդյանը մանրամասներ բացահայտեց ապրիլի 7-ին ԵԿՄ նախագահի ընտրություններից:

Նա նշեց, որ այդ ընտրությունները որևէ բանով չէին տարբերվում Մանվել Գրիգորյանի ժամանակների ընտրություններից, իսկ Սասուն Միքայելյանն էլ որևէ բանով չի փորձել տարբերվել Մանվելից:

Նա ևս ունի իշխող մեծամասնության հովանավորությունն, ինչպես որ դա ուներ Մանվել Գրիգորյանը՝ հանձին Սերժ Սարգսյանի:

Կոռնիձորի Արոն այդ օրը ներկայացրեց նաև ԵԿՄ իր անդամատոմս ու հայտարարեց, որ դադարեցնում է անդամակցությունը ԵԿՄ-ին. չի ցանկանում նույն տարածքում լինել Միքայելյան Սասունի հետ:

Բացի այդ, նա նաև խոսեց ԵԿՄ-ի վաճառված անդամատոմսերի մասին, ինչին շտապել է արձագանքել ԵԿՄ-ն՝ տարածելով հայտարարություն և հերքելով այն լուրը, թե Վազգեն Սարգսյանի օրոք ԵԿՄ անդամության վկայականներ են վաճառվել:

«Երկրապահ կամավորականների միության նորընտիր վարչությունը խստորեն դատապարտում է Ա. Խուդավերդյանի այն անհիմն հայտարարությունը, ըստ որի՝ 1996թ. ԵԿՄ հիմնադիր հավերժ նախագահ Սպարապետ Վազգեն Սարգսյանի օրոք ԵԿՄ անդամության վկայականներ են վաճառվել: ԵԿՄ վարչությունը ամենայն պատասխանատվությամբ հայտարարում է, որ դա ստոր զրպարտանք է Սպարապետի հիշատակի հանդեպ. Վազգեն Սարգսյանի անմիջական ղեկավարման ներքո գտնվող ԵԿՄ-ում, բոլորին է հայտնի, նման երևույթներն իսպառ բացառվում էին: Կոչ ենք անում և պահանջում այսուհետ զերծ մնալ Սպարապետի և ազատամարտի մասնակիցների անունը շահարկելուց»:

Իհարկե այս հայտարարության նպատակը ոչ այնքան Սպարապետ Վազգեն Սարգսյանի հիշակատը պաշտպանելն էր, որքան Սասուն Միքայելյանի ուժի ցուցադրումն արդեն ԵԿՄ նախագահի դիրքերից:

Չէ՞ որ Միքայելյանը, մոռանալով, որ նախկինում ասել էր, որ խնդրեն էլ՝ ԵԿՄ նախագահ չի դառնա՝ հոգու խորքում երազելով դրա մասին, հասել է այդ կետին: Այսօր, շնորհիվ Փաշինյանի հետ անցած ճանապարհի կամ կիլոմետրերի, հասել է նպատակին՝ այդ ճանապարհից հեռացնելով իր կողմից այդպես խորը ակնածանքով հիշատակված Սպարապետի եղբորը:

Սա է սասունմիքայելանական ճշմարտությունը. ու այսօրվա հայտարարությունը դեռ առաջին ծիծեռնակն է:

Կռնիձորի Արոյի և Սասուն Միքայելյանի համակարտության նոր փուլն սկսված է:

NEWSPRESS.am