Մեծ սրտի տեր Աղաջանյանը ձևը գտել է

ՀՀ վարչապետի աշխատակազմի ղեկավար Էդուարդ Աղաջանյանը, որը պաշտոնը ստանձելուց հետո որևէ օգտագար գործով չի կարողացել զբաղվել, պրպտել ու մամուլի էջերին հայտնվելու տարբերակ է գտել:

Ճիշտ է՝ Աղաջանյանը լավ կաներ, որ ԶԼՄ-ներում հայտնվեր իր ակտիվ քաղաքական գործունեության կամ ստանձնած պարտականության փայլուն կատարման շրջանակներում, բայց ոչ, այս անգամ ևս, ինչպես իր թիմակից շատ-շատերը, որոշել է խոսել բացարձակապես անձնական քայլերի և հերսացման պաթոսի մասին:

Պարզվում է՝ նա այնքան մեծահոգի է, որ հրաժարվել է պետության հաշվին իրեն տրված ծառայողական մեքենայից:

Այդ մասին Աղաջանյանը տեղեկացրել է ֆեյսբուքի իր էջում:

Նա հայտնել է, որ հրաժարվել է իրեն կցված ծառայողական ավտոմեքենայից, բայց գործնական նպատակներով այցերին օգտվում է հերթապահ ավտոմեքենաներից:

«Տվյալ հարցի կոնտեքստում մեկ այլ «սկանդալային բացահայտում» տեղի ունեցավ։ Պարզվում է՝ որպեսզի հանրության ուշադրությունը շեղեմ իմ դավադիր նպատակներից, հատուկ փոխել եմ իմ նախկին ավտոմեքենան և այժմ թաքուն պտտվում եմ Երևանի փողոցներով։ Պետք է այստեղ էլ հիասթափեցնեմ։ Մերսեդես մակնիշի ավտոմեքենան ուղղակի հանձնել եմ փոխվարչապետ Մհեր Գրիգորյանին, քանի որ վերջինիս ավտոմեքենայի ընթացիկ ծախսերը ֆինանսապես անարդյունավետ էին դարձնում դրա շահագործումը։ Քանի որ մեր ավտոպարկում այլ ներկայացուցչական դասի ավտոմեքենա չկար, որոշում կայացրեցինք սույն Մերսեդեսը տրամադրել փոխվարչապետին՝ այն փոխարինելով Տոյոտա Պրադո մակնիշի մեքենայով»,-գրել է Աղաջանյանը:

Կառավարության անդամներն այնքան պարապ են, որ փաստորեն ողջ օրն անցկացնում են կայքերը մոնիթորինգ անելով: Նրանք գերակտիվությամբ են արձագանքում, բայց ոչ թե հասարակական դժգոհություններին, մարդկանց խնդիրներին, այլ բացառապես իրենց անձին առնչվող լուրերին:

Այս անձանց համար պետական ծառայություն ասվածը կոստյում հագնելն ու վարչապետի կողքին լուրջ դեմքով կանգնելը կամ նստելն է. Սրանց համար չկա այլ աշխատանք այս թեթև ժամանցից բացի, ու սա է պատճառը, որ սույն պարոնն, ով, ի դեպ, կառավարության կազմում միակը չէ, գերզգայուն է իր հասցեին գրված ցանկացած բառի և նախադասության նկատմամբ:

Այո՛, քննադատություն նորեկները չեն հանդուրժում: Նրանք ցանկացած քննադատության պատասխանում են իրենց հասցեին դիվերամբներ ձոնելով:

Որ Աղաջանյանի մասին բան գրած չլինեին, հո հիմա չէինք իմանա, որ իրենից կտրել և մեծահոգաբար Մհեր Գրիգորյանին է նվիրել այդ Մեսեդեսը:

Ինչ խոսք, ցավալի է, որ պետությանը ծառայելն այս պաշտոնյաների մոտ դրսևորվում է բացառապես ճիշտ ֆուտլյարի մեջ մտնելով, իսկ հիմա նաև դրոշը ճիշտ տեղում կախելով, բայց ափսոոս, որ դրանից պետությանը օգուտ չի լինում:

NEWSPRESS.am