Միլիոնանոց ֆուրշետն ու ձգված ընդունելությունը

Ապրիլի 10-ին լրացավ Բարձրագույն դատական խորհրդի կազմավորման 1-ամյակը և այս առիթով ՀՀ վարչապետ Նիկոլ Փաշինյանն այսօր այցել էր ԲԴԽ՝ մասնակցելու խորհրդի կայքի շնորհանդեսին և նոր մասնաշենքի բացման արարողությանը։
Միջոցառմանը ներկա էր նաև Ազգային անվտանգության ծառայության տնօրեն Արթուր Վանեցյանը:

ԲԴԽ նախագահ Գագիկ Հարությունյանը միջոցառմանը ներկա դատական, օրենսդիր և գործադիր մարմնի ներկայացուցիչներին հայտնեց, որ ԲԴԽ-ն դատավորի և դատարանի անկախության երաշխավորման սահմանադրաիրավական առաքելության իրականացման նպատակով լրազորությունների ստանձնման պահից իր առջև խնդիր է դրել հետևողական ու արդյունավետ աշխատանքի շնորհիվ երաշխավոր դատական իշխանության համարժեք տեղն ու դերը իշխանությունների բաժանման և հավասարակշռման համակարգում։

Վարչապետ Նիկոլ Փաշինյանն էլ իր հերթին, շնորհավորելով ԲԴԽ-ի կազմավորման մեկ տարին` կարևորեց դատական անկախ համակարգը՝ հեղափոխության արդյունքում տեղի ունեցած փոփոխություններն ինստիտուցոնալ առումով ամրապնդելու համար։
Եվ այս փոխադարձ արարողակարգային ելույթներն այդպես էլ այսօրվա միջոցառումը որևէ այլ բանով աչք չէին ծակի, եթե չլիներ ֆուրշետը:

Բոլորիս ուշադրությունը գրավեցին ԲԴԽ-ում բացված ֆուրշետի ճոխ սեղանները: Տպավորություն էր, որ մենք գտվում ենք մի վայրում, որտեղ պատրաստվում են ընդունել արաբական շեյխերի:

Գագիկ Հարությունյանը շեյխին վայել ընդունելություն ցույց տվեց Փաշինյանին՝ հավանաբար ազդված լինելով նրա երեկվա անտակտ պահվածքից՝ թե երբ վարչապետին տեսնում եք՝ ձգված կանգնեք:

Անտարակույս, ԲԴԽ-ում այսօր բոլորը ձգված էին, Փաշինյանը, հավանաբար, շոյված լինելով միլիոնանոց ֆուրշետից ու ձգված ընդունելությունից՝ այսօր ազատման դիմումներ գրելու հրովարտակ չհնչեցրեց:

NEWSPRESS.am