Ո՞ւմ պատվերով դաշտ մտավ «Սպայկա»-ին փոխարինողը

Գյուղատնտեսական ապրանքների մթերման և բերքահավաքի սեզոնին գյուղացու հույսը համարվող «Սպայկա» ընկերությունը տարածեց հայտարարություն, որով տեղեկացրեց, որ արտասահմանյան բանկերում իր վարկային միջոցների հետկանչի պատճառով այս տարի հայաստանյան շուրջ 80 գյուղերում չի կարողանա մթերում իրականացնել։

«Ներկայումս ընկերության տնօրենի կալանավորման և պետական մարմինների ու պաշտոնյաների կողմից ենթադրական մեղադրանքների վերաբերյալ հայտարարությունների արդյունքում սկսվել է արտասահմանյան բանկերի կողմից ընկերության վարկային միջոցների հետկանչման գործընթաց, որի արդյունքում կարող են սառեցվել ընկերության հաշիվները, կալանքի տակ դրվել գրավադրված գույքը, այդ թվում՝ բեռնատարները: Նման պայմաններում ընկերությունը չի կարողանալու օգտվել շրջանառու միջոցներից և կազմակերպել նախապես պլանավորած մթերում»,- ասված էր ընկերության տարածած հայտարարության մեջ։

Ու որպեսզի այս հայտարարությունը փողոց չհանի «Սպայկա»-ի ողջ թիմն ու գյուղացիների զգալի հատվածին, որոնք կարող են ական լինել Փաշինյանի կառավարության տակ, ժամերի ընթացքում մեյդան եկավ մի նոր բեռնափոխադրող կազմակերպություն, որն իբրև թե, պատրաստ է մթերել գյուղացիների բերքը և կանգնել գյուղացու կողքին:

Խոսքը «Բեստ Ֆրութ Լոգիստիկս Ցենտր» անհայտ մի ընկերության մասին է, որը, պարզվում է՝ պատրաստ է իրականացնել հսկայական ծավալի մթերումներ և հոգ չէ, որ այս ընկերությունը դեռ կազմավորման փուլում է:

Թե ինչպես «Սպայկա»-ին ժամերի ընթացքում փոխարինող հայտնվեց դաշտում, և արդյո՞ք այս ընկերությունն ի նկատի ուներ վարչապետ Նիկոլ Փաշինյանը, երբ երեկ մաքսատանը լրագրողների հետ զրույցում ասաց, որ «Սպայկա»-ն կգնա և կգա նորը, թողնում ենք ընթերցողի դատին:

Միայն հիշեցնենք, որ այս նորահայտ խոշորի անվան տակ դեռ կազմավորվող և մեկ-երկու մեքենա ունեցող ընկերության ֆեյսբուքյան էջում թարմացումներն առավել ակտիվ են 2019 թվականի ապրիլ ամսից, ինչը համընկնում է «Սպայկա»-ի գլխին ևս ամպերի կուտակման ժամանակահատվածի հետ:

Ընկերության ֆեսյբուքյան էջում հրապարակված լուսանկարների տակ գրված մեկնաբանություններն էլ երբ ընթերցում ես, թե՝ կեցցե՛ «Սպայկա»-ի ոչնչացումը, մենաշնորհը վերացվեց, հասկանում ես՝ «Բեստ Ֆրութ Լոգիստիկս Ցենտր»-ը պրոյեկտ է՝ ընդդեմ …կամ գուցե այս ընկերությունն ընդամենը մեկ-երկու մեքենայով մի քանի հարյուր կիլոգրամ բեռնափոխադրում էր իրականացնում, բայց այսօր ակամայից դարձավ «Սպայկա»-ի գործի շարունակողը բեռնափոխադրման շուկայում՝ պատվերով:

NEWSPRESS.am