Ինչպես տիրանալ ուրիշի սեփականությանը՝ ՀՀԿ-ի օրինակով

«Սպայկա» ընկերության տնօրենն այսօր կալանավորվեց, այլ խոսքով ասած` կալանավորվեց գյուղացիների կարևոր գործընկեր կազմակերպության ղեկավարը:

Հետաքրքական է, որ «Սպայկա»-ի տնօրենը կալանավորվեց հենց այն ժամանակ, երբ նրա անձնական երաշխավորությամբ ընկերությանը պետք է տրմադրվեր 100 մլն դոլարի վարկ՝ նոր գործարան բացելու, հետևաբար, նոր աշխատատեղեր ստեղծելու համար:

Փաշինյանական արդարադատությունը քար գցեց այդ ներդրումային ծրագրի վրա, էլ չասած, որ Հայաստանն օտարերկրյա և տեղացի ներդրողների համար ևս մեկ անգամ դարձավ ոչ վստահելի բիզնես-միջավայր, մինչդեռ բղավում են հակառակի մասին:
Դավիթ Ղազարյանը ձերբակալվեց այն տրամաբանությամբ, ինչը գործում է մեր երկրում թավշյա հեղափոխությունից հետո ձերբակալությունների գրեթե կեսի հիմքում՝ նախ ձերբակալել և անվանազրկել մարդուն՝ այնուհետև նրա հագով կարել համապատասխան քրգործ: Կստացվի՝ լավ, չի ստացվի՝ արդեն հեղինակազրկված քաղաքացուն ազատ կարձակեն հանցակազմի բացակայության հիմքով:

Պարզվում է՝ Դավիթ Ղազարյանն ասում է՝ ապացուցեք, հիմավորեք թվերով, որ պետությանը պարտք եմ 7 մլրդ դրամ գումար, այն պատրաստ եմ վճարել, սակայն նրա նկատմամբ ընտրվում է երկամսյա կալանքը՝ հիմնավորումները սեղանին դնելու փոխարեն:

Սա սեփականության վերաբաշխման պարզունակ մեխանիզմ է, որին դիմել են նաև մերժված իշխանությունները:

Հենց այսպես են մերժվածներն ունեզրկել մարդկանց, իսկ Փաշինյանն իր խաղի տեմպերով պարզապես գերազանցում է իր նախորդներին:

Կա՞ր արդյոք որևէ հիմնավորում, որ «Սպայկա»-ն՝ ՀՀ ամենամեծ ընկերություններից մեկը, այլևս չի աշխատի Փաշինյանի համար, իհարկե չկա: Որևէ մեկը չի կարող հերքել, որ «Սպայկա»-ն չեն խլի այնպես, ինչպես ժամանակին խլեցին Խաչատուր Սուքիասյանի բիզնեսը և այն ծառայեց ՀՀԿ-ի շահերը սպասարկող գործարարին: 

Ի դեպ՝ նախորդ իշխանության նկատմամբ շանտաժ անելով իշխանության եկած վարչապետն այսօր Ազգային ժողովում իր քաղաքական թիմի անդամների հետ հանդիպումից հետո ասել է, որ որևէ ընկերություն չի կարող ՀՀ քաղաքացու և գյուղացու հետ շանտաժով խոսել: Փաշինյանն իրեն բնորոշ ոճով դեռ միայն սպառնում է, իսկ «Սպայկա» ընկերության աշխատակիցները խոստանում՝ չեն լռելու, շարունակելու են բողոքի ակցիաները, որոնք գուցե վերաճեն և դառնան թավշյա հեղափոխությունից հետո ամենամասշտաբային բողոքի ակցիան՝ վտանգ սպառնալով այդ ակցիաներով իշխանության եկած Փաշինյանին:

NEWSPRESS.am