Ամեն ինչ սո՞ւտ էր. ԱԺ-ն հաստատում է «Քաղաքացու օրը», իսկ այդ պահի քաղաքացիները ձերբակալվում են

Ազգային ժողովում քննարկում են ապրիլի 23-ը «Քաղաքացու օր» հռչակելու մասին հարցը, հաշվի առնելով, որ այդ օրը ՀՀ երրորդ նախագահ Սերժ Սարգսյանը հայտարարեց, թե՝ «Նիկոլը ճիշտ էր, ես սխալվեցի...» ու հեռացավ պաշտոնից:

Կառավարությունը՝ Նիկոլ Փաշինյանի գլխավորությամբ, այդ օրը համարում է պատմական և նշանակալից նրանով, որ քաղաքացին արտահայտեց իր կամքը, տեր եղավ իր խոսքին ու կատարվեց քաղաքացու կամքը:

Թվում է, թե ամեն ինչ ճիշտ է, ու Նիկոլն իսկապես ճիշտ էր, սակայն փաստն այն է, որ օրեցօր դժգոհությունների ալիքը բարձրանում է, ու մարդիկ արդեն գրեթե վստահ են, որ ոչինչ չիփոխվել՝ միայն իրենց վիճակն է վատացել. հազարավոր գործազուրկներ են ավելացել, ներդրումներ չկան, խոչընդոտներ են առաջացել բիզնեսի նկատմամբ ու մարդիկ շարունակում են արտագաղթել: Այս ամենի հետ էլ՝ սահմանին լարվածություն է առաջանում...

Զավե՞շտ ասեն, թե ՞ ողբերգություն, որ այդ դժգոհությունների ալիքը կառավարությունը չի նկատում: Այդ մասին նույնիսկ Փաշինյանը հայտարարեց իր ասուլիսի ժամանակ:

Ու մինչ ԱԺ-ում քննարկում են քաղաքացու կամարտահայտման օրը տոն հռչակելու մասին, «Սպայկա» ընկերության 1000-ավոր աշխատակիցներ Կենտրոնի դատարանի դիմաց ակցիա են իրականացնում: Նրանց տնօերնը կալանավորվել է: Քաղաքացիներին սպառնում է գործազրկությունը:

Ակցիան հեռարձակվում է բոլոր կայքերով ու նաև հեռուստատեսությամբ, և ԱԺ պատգամավորներն էլ տեղյակ են այդ մասին, սակայն պատգամավորներից և ոչ մեկի մտքով չի անցնում գնալ ակցիայի անկացման վայր և հարցնել քաղաքացիներից՝ արդյոք նրանք գո՞հ են մեկ տարի առաջ կատարած իրենց ընտրությունից, արդյոք նրանք համարո՞ւմ են, որ փողոց փակելով հարց լուծեցին, արդյոք ուզո՞ւմ են այդ օրը հիշատակել, տոն դարձնել... 

Քաղաքացիների կամքը հարցնող չկա: Փոխարենը քայլարած պատգամավորները հպարտությամբ հայտարարում են, թե կողմ են քվեարկելու այդ օրը տոն դարձնելու համար, ու միայն քննարկվում է հարցը, թե ինչպե՞ս անել, որ այն հանակարծ ապրիլի 24-ի հետ չհամընկնի:

Մինչդեռ փողոցում մարդիկ գոռում են արդեն, թե իզուր հեղափոխություն արեցին, որ Փաշինյանն իրենց խաբեց, որ երկրում արդարադատություն չկա, որ փաշինյանն իրենց նպաստից կտրեց ու հիմա էլ աշխատանքից է փորձում կտրել: Նրանք պահանջում են արդեն ո՛չ թե հեղափոխական Նիկոլի, այլ վարչապետ Փաշինյանի հետ հանդիպում, սակայն այս երկուսի մեջ արդեն անանց անդունդ կա...

Հեղափոխական Նիկոլն ուզում էր մարդիկ դուրս գան փողոց՝ իրենց կամ գուցե իր կամքն արտահայտելու և պահանջին տեր կանգնելու համար, իսկ վարչապետ Փաշինյանը միայն սպառնում է «դատարանի ծակը կոխել», «ասֆալտին փռել» ու «պատին ծեփել»: Նա հայատարրում է, թե այսօր ոչ ոք չպետք է բողոքի ակցիա կազմակերպի և փողոց փակելու լիազորություն չունի...

Դե իհարկե, այդ լիազորությունն ուներ միայն ինքը՝ Նիկոլը, դա նրա մենաշնորհն էր երևի նրա համար, որ, օդում կախված լուրերի համաձայն նա  Սերժ Սարգսյանի «հաճախորդն» էր: Իսկ այսօր էլ արդեն վարչապետ է դարձել ու կարող է գոռալ բոլորի վրա, սաստել, թե «հանգիստ նստեք տեղներդ»... ու գրողի ծոցը, թե մի քանի հազար մարդ էլ անգործ կմա. հերն էլ անիծած, որ ԱԺ-ի կողմից «Քաղաքացու օրը» հաստատելու պահին, մի քանիսը այդ պահին ձերբակալվում էին՝ իրենց կամքը արտահայտելու համար...

Նրանք բղավում են, որ ամեն ինչ սուտ էր և իրենց խաբեցին...

Այս օրը գուցե անցի ու բոլորը գոհ լինեն, չաղ ու բախտավոր, միայն քաղաքացու օրը նշող քաղաքցին իրեն կզգա անգործ, ընչազուրկ, ճնշված և խաբված...

Արմինե Մկրտումյան