Մոսկվայում կհանդիպե՞ն արդյոք Մնացականյանն ու Մամեդյարովը

Ապրիլի 5-ին Մոսկվայում տեղի կունենա ԱՊՀ երկրների ԱԳ նախարարների խորհրդի հերթական նիստը։ Սա թեևս իր բնույթով, կարելի է ասել, սովորական նիստ է, սակայն կարևոր է մեզ համար այնքանով, որ առաջին խոշոր միջոցառումն է, որտեղ կարող են հանդիպել ՀՀ ԱԳ նախարար Զոհրաբ Մնացականյանն ու Ադրբեջանի ԱԳ նախարար Էլմար Մամեդյարովը՝ Վիեննայում մարտի 29-ին տեղի ունեցած Փաշինյան-Ալիև հանդիպումից հետո։

Լիովին հնարավոր է, որ համանախագահների հայտարարության մեջ ասված հանձնարարականը ԱԳ նախարարներին՝ ևս մեկ հանդիպում ունենալու հետ կապված, կյանքի կոչվի հենց ԱՊՀ ԱԳ նախարարների խորհրդի նիստի շրջանակներում։ Այս պահին հայտնի է, որ Զոհրաբ Մնացականյանը գտնվում է Եթովպիայում, ու այսօր ավարտվում է նրա այցը այդ երկիր, իսկ Էլմար Մամեդյարովն արդեն Մոսկվայում է։ Առհասարակ, եթե ամփոփենք Վիեննայի հանդիպումը, ապա այս փուլում Մնացականյանն ու Մամեդյարովը, ամենայն հավանականությամբ, խոսելու են այն մարդասիրական միջոցառումների և այլ քայլերի մասին, որոնք, ըստ համանախագահների հայտարարության, նպաստելու են որպեսզի՝

ա․ խաղաղությունը ամրապնդվի,

բ․ բարձրացնի վստահության մակարդակը կողմերի միջև։

Որպես այդպիսի օրինակ կարող է լինել նախ և առաջ անհայտ հանգամանքներում կամ մոլորվելու հետևանքով միմյանց պետական սահմանը հատած ու հակառակ կողմի հսկողության տակ հայտնված քաղաքացիների փոխանակությունը։

Հիշեցնենք, որ և մեզ մոտ կա Ադրբեջանի նման քաղաքացի, և Բաքվում կա ՀՀ նման քաղաքացի։ Հնարավոր է նաև, որ առաջիկայում կազմակերպվեն մտավորական, լրագրողական հանրույթի ներկայացուցիչների փոխայցեր կամ տեսակապային շփումներ, ինչը կարող է զուտ մարդկային ձևով նվազեցնել իրար դեմ առկա լարվածությունը այսպես ասած՝ «հորիզոնական մակարդակում», ինչը նաև բավական լավ աշխատող մեթոդ է «ժողովրդական դիվանագիտության» առումով։ Բեկումնային հարցեր, անշուշտ, չեն քննարկվի ո՛չ Մամեդյարով-Մնացականյան հնարավոր հանդիպման ընթացքում, ո՛չ էլ ԱՊՀ ԱԳ նախարարների նիստի ժամանակ։ Թերևս վերջին պարագայում ամփոփիչ հայտարարության մեջ կբավարարվեն ստանդարտ ձևակերպումներով պարբերությամբ։

NEWSPRESS.am