Ուշադրություն. Յակուտիայում սահմանափակվում են արտագնա աշխատանքի մեկնածների իրավունքները

Այն բանից հետո, երբ աշխատանքային միգրանտի կողմից Յակուտիայում սեքսուալ բռնության էր ենթարկվել տեղացի մի կին, Ռուսաստանի դաշնային այդ սուբյեկտում որոշում են կայացրել սահմանափակել միգրանտների գործունեության դաշտը, թույլատրելի ոլորտները, որտեղ նրանք կարող են ներգրավվել։ Սա, ինչ խոսք՝ վատ նորություն կարող է լինել ողջ հետսովետական տարածքի՝ ներառյալ նաև Հայաստանի այն բնակիչների համար, որոնք իրենց ապրուստը հոգում են դեպի Ռուսաստան իրականացվող արտագնա սեզոնային աշխատանքով։

Կա մտավախություն, որ Յակուտիային կարող են հետևել նաև այլ ռեգիոններ։ Մի կողմից ավելանում են ահազանգերն առ այն, որ միգրանտները Ռուսաստանում գտնվում են գրեթե ստրկական պայմաններում, սակայն մյուս կողմից էլ՝ ռուսաստանցիների մոտ այն համոզումն է արմատանում, որ աշխատանքային միգրանտները գալիս ու բառացիորեն խլում են այն աշխատատեղերը, որտեղ կարող էին իրենց ներգրավել։ Ռուսական կողմի պաշտոնատարները չեն էլ թաքցնում, որ նման կտրուկ քայլերի են գնում, որպեսզի հանգստացնեն իրենց քաղաքացիներին։

Այսինքն՝ միգրանտների խնդիրն այս դեպքում դառնում է պարզապես խաղաքարտ, որի շահարկումով իշխանությունները տեղերում փորձում են հանդես գալ որպես արդարամիտ ու սեփական քաղաքացիների կարծիքը հաշվի առնող։ Արդյունքում, Յակուտիայում այս տարի արդեն տնտեսության 33 ոլորտներում աշխատանքային միգրանտների ներգրավվածությունը կլինի անհասանելի։

Խոսքը ձկնորսության, գյուղատնտեսության, անտառտնտեսության, որսորդության, շինարարության, առևտրի, տաքսիների, տրանսպորտի ու սոցիալական ծառայությունների ոլորտների մասին է։ Յակուտիայում կարծում են, որ օրենք չեն խախտել նման սահմանափակում մտցնելով ու իրենց կողմից սահմանած սահմանափակումները լիովին համապատասխանում են ռուսական դաշնային օրենսդրությանը։

Այն, որ ռուսական դաշնային օրենսդրությունը նման սահմանափակումներ կիրառելու իրավունք տեղերի իշխանություններին տալիս է, դա հասկանալի է, և իրավակիրառական պրակտիկայում նախադեպեր եղել են, սակայն անհասկանալի է այն, որ մեկ հանցադեպի հիման վրա կարելի է նման պոպուլիստական քայլի գնալ ու անունն էլ դնել հօգուտ տեղացիների աշխատանքային շուկայի պաշտպանություն։ Ի վերջո, որևէ մեկի համար գաղտնիք չէ, որ աշխատանքային միգրանտները կենսական անհրաժեշտություն են բոլոր խոշոր տնտեսությունների համար։

NEWSPRESS.am