Հակված եմ ասելու, որ պատերազմ լինելու է. Լևոն Մնացականյան (տեսանյութ)

Հերթական անգամ համոզվում ենք, որ Արցախի Հանրապետության անվտանգության ապահովման հիմնական երաշխավորը հանդիսանում է հենց Պաշտպանությանը բանակը, որը հերթական անգամ ապացուցեց 2016 թվականի ապրիլյան պատերազմի ժամանակ: Այդ մասին Արցախի Հանրային հեռուստաընկերության եթերում ասել է Արցախի Պաշտպանության բանակի նախկին հրամանատար, այժմ Արցախի արտակարգ իրավիճակների պետական ծառայության տնօրեն Լևոն Մնացականյանը: 

Նա խոսել է ապրիլյան պատերազմի մասին և շնորհակալություն հայտնել բոլոր նրանց ծնողներին, ովքեր իրենց կյանքը նույնիսկ չեն խնայել՝ պայքարելով հայրենիքի համար: 

Մնացականյանը նաև անդրադարձել է Արցախի ՊԲ նախկին հրամանատար Սամվել Բաբայանի այն մտքին, որ ապրիլին տեղի ունեցած իրադարձությունները ոչ թե պատերազմ, այլ դիվերսիա էին. «Ես նորից մնում եմ իմ համոզմունքին, իմ ասածին, որովհետև ոչ թե դա ասվել է ասվելու համար, այլ ասվել է բազմակողմանի վերլուծության արդյունքում: Այստեղ միանշանակ եղել է պատերազմ: Դիվերսիայի միջոցով այս հիմնական նպատակներին հասնելն անհնարին էր, այդ նպատակներին հասնում են միայն պատերազմի միջոցով՝ հարավից դեպի հյուսիս, բոլոր ուղղություններով եղել է հակառակորդի հարձակում: Սկզբից՝ դիվերսիոն գործողությունների միջոցով, որին հաջորդել են համազորային բոլոր ուժերը, և դրան են միացել Զինված ուժերի մյուս զորատեսակները: Այդ օրերի ընթացքում կիրառվել են համազորային բոլոր զենքերը, ընդհուպ մինչև Տ-90 տանկ՝ հարավային ուղղությամբ, կիրառվել են ականանետային, փողային, ռեակտիվ հրետանին, հրթիռային զորքերը, բանակային և մարտավարական ավիացիան, անօդաչու թռչող սարքեր, «Սմերչ» կայանքները և այլն: Այդքանից հետո ասել, որ դա դիվերսիա է, ծիծաղելի է»,- նշել է նա: 

Մնացականյանն անդրադարձել է նաև այն մեղադրանքներին, ըստ որոնց՝ բանակի բարձրաստիճան ղեկավարությունը նախապես տեղյակ է եղել ապրիլյան պատերազմական գործողությունների սկսման մասին և հերքել դրանք: 

Գնահատելով այսօրվա իրավիճակը և պատերազմի վերսկսման հավանականությունը՝ Մնացականյանն ընդգծել է, որ այսօր իրավիճակը «արտաքինից հանգիստ է»:

«Եթե մենք իրավիճակին նայենք, կարող է սխալվենք: Մենք պետք է զգանք, որ հակառակորդն ամեն օր ձեռք է բերում նոր նմուշներ, ամեն օր ընդլայնում է իր զինանոցը, ամեն օր իրականացնում է պարապմունքներ՝ դրանց յուրացման և դրա համար ընդգրկում է հրահանգիչներ տարբեր առաջատար երկրներից, որի համար, իհարկե, վճարում է: Եվ չեմ կարծում՝ այդքանն արվում է խաղաղության համար: Ուզում ես խաղաղություն, ուրեմն պետք է պատրաստվես պատերազմի: Եվ մեր պարագայում ավելի շատ հակված եմ ասելու, որ պատերազմ լինելու է: Վերջ ի վերջո, անկախությունը դե ֆակտո կա, պետք է նաև հաստատվի դե յուրե: Մենք գիտենք, որ մյուս կողմը դրան համաձայնություն չի տա: Այդ հարցը պետք է լուծվի, իսկ լուծման միակ ճանապարհը, կարծում եմ, որ ռազմական է, և պետք է պատրաստվենք մարտական գործողությունների: Վաղ թե ուշ այդ գործողությունները կլինեն»,- նշել է նա: 

Մանրամասները՝ տեսանյութում