Բանակցությունների իմիտացիա. Ադրբեջանը պատրաստվում է պատերազմի

Քաղաքագետ Արտյոմ Բալասանովը ֆեյսբուքյան իր էջում գրել է. 

«Ադրբեջանի դիրքորոշման փոփոխություն ղարաբաղյան հակամարտության կարգավորման հարցում չի եղել, հայտարարել է Ադրբեջանի նախագահ Իլհամ Ալիևը:

«Այս հակամարտությունը պետք է գտնի իր լուծումը Ադրբեջանի տարածքային ամբողջականության շրջանակներում: Բանակցությունների նպատակն ադրբեջանական տարածքների ազատագրումն է»,- ասել է Ի.Ալիևը՝ Ադրբեջանի պաշտպանության նախարարության հատուկ նշանակության ուժերի զորամաս այցի ժամանակ:

Նրա խոսքով՝ Հայաստանի հետ հակամարտությունը դեռ չի ավարտվել: «Մենք ապրում ենք պատերազմի պայմաններում: Պատերազմը դեռ չի ավարտվել: Առաջին փուլն է ավարտված»,- ասել է Ի.Ալիևը:

Ադրբեջանական կողմը 2018թ. հոկտեմբերից սկսած ինժեներաշինարարական աշխատանքներ է կատարել սահմանի ամենահյուսիսային կետից մինչև Ադրբեջանի Ղազախի շրջանի Ջաֆարլու գյուղ հատվածի առնվազն 17 կետում:

Բարեկարգվել, ընդլայնվել և ամրացվել են եղած դիրքերը և դիրքեր տանող ճանապարհները, որոշ դեպքերում նոր ճանապարհներ են կառուցվել:

Վերոնշյալ աշխատանքները մեկնարկել են 2018 թ. հոկտեմբերից, երբ առաջնագծի այդ հատվածում Ադրբեջանի բանակի 707-րդ մոտոհրաձգային բրիգադին փոխարինելու եկան Ադրբեջանի Պետական սահմանապահ ծառայության (ՊՍԾ) ստորաբաժանումները:

Շատ է խոսվում և քննարկվում ղարաբաղյան ճակատում Ադրբեջանի սադրիչ գործողությունների մասին, սակայն ոչ պակաս կարևոր է նրանց «ակտիվությունը» Տավուշի մարզի ուղղությամբ։

Ադրբեջանի զինված ուժերը մինչև թավշյա հեղափոխությունը կրակելով սահմանամերձ գոտում գտնվող գյուղերի ուղղությամբ ցանկանում էին ստիպել տեղի սահմանապահ բնակչությանը արտագաղթել՝ սոցիալ–տնտեսական ծանր վիճակին գումարել նաև վախի մթնոլորտ ստեղծելու ռազմավարությունը, կրակելով նաև դպրոցների, մանկապարտեզների վրա, ստիպել բնակչությանը կրակի տակ գտնվող գյուղից դեպի այլ ապահով՝ Դիլիջան, Իջևան, Նոյեմբերյան քաղաքներ (ներքին միգրացիա) տեղափոխվել կամ ընդհանրապես արտագաղթեցնել ՀՀ-ից։

Բացի այդ, անընդհատ լարվածության տակ պահելով Տավուշի մարզի բոլոր սահմանային զորամասերն՝ առաջնագիծը, 3–րդ բանակայինին թույլ չտալ օգնության հասնել Ղարաբաղին՝ մարտական գործողությունների վերսկսման դեպքում այդ միավորումները մնալու են դիրքերում՝ պահելու համար կրակի տակ գտնվող Տավուշի դիրքերը։

Ադրբեջանը ցանկանում է նաև Տավուշով անցնող միջպետական՝ ՀՀ–Վրաստան ճանապարհը՝ նրա որոշակի հատվածներ, դարձնել դժվարանցանելի ու վտանգավոր՝ Ոսկեպար և այլ հատվածները պահելով կրակի տակ ստիպել կառուցել պաշտպանական պատեր և շրջանցող ճանապարհներ՝ րկարացնելով ճանապարհը, լրացուցիչ միջոցներ ուղղել տալով բյուջեից այդ ճանապարհների շինարարության և հետագայում պահպանման ուղղությամբ։

Խախտել կոմունիկացիաները՝ վտանգելով մեքենաների տեղաշարժը, ինչն էլ կարող է ազդել զբոսաշրջության վրա:

Նշենք, որ Տավուշի մարզի հարևանությամբ է գտնվում Ադրբեջանի Գյանջա–Ղազախական տնտեսական շրջանը, որտեղով անցնում են ռազմավարական նշանակության նավթամուղեր, գազամուղեր, երկաթգիծ և միջպետական ավտոմայրուղիներ դեպի Վրաստան, Թուրքիա և Սև ծով։ Այդ շրջանի պաշտպանությունն Ադրբեջանի համար ունի կենսական նշանակություն և այդ շրջանի կորուստը նրանց համար «կփակի» ճանապարհը դեպի Վրաստան, Թուրքիա, ինչն էլ էականորեն ազդելու է ապագա պատերազմի ելքի վրա»։