Նազենին արագ սրբագրում է իր կենսագրությունը

Մինչ Մշակույթի նախարարի պարտականությունները կատարող Նազենի Ղարիբյանն Օպերայի թատրոնի աշխատակիցներին փորձում էր հանգստացնել, որ Կոնստանտին Օրբելյանը հայերենին չի տիրապետում, ոստի, ըստ օրենքի, չի կարող զբաղեցնել Օպերայի թատրոնի գեղարվեստական ղեկավարի և տնօրենի պաշտոնը, մամուլը Ղարիբյանին հիշեցնում է, որ ինքն ունի երկաքաղաքացիություն՝ Հայաստանի և Ֆրանսիայի, ուստի չի կարող կատարել Մշակույթի նախարարի պարտականությունները։

Դերասան Սերգեյ Դանիելյանը ֆեյսբուքյան իր էջում այս թեմայի վերաբերյալ գրառում է կատարել, որում ասված է․

«1-ին՝ Տիկին Նազիկը Ֆրանսիայի քաղաքացի է և իրավունք չունի մշնախ պաշտոնակատար լինել ու առավել ևս լուրջ որոշումներ ընդունել։

2-րդ՝ Օպերայի կոլեկտիվը պիտի դիմի Ֆրանսիայի դեսպանությանը, որ իր քաղաքացուն ետ կանչի՝ երկրում անօրինական գործունեություն ծավալելու համար:

3-րդ՝ երբ մշնախը ձևավորվի, պետք է օրենք ընդունվի թատրոնների մասին, որ գեղարվեստական ղեկավարը և տնօրենը համատեղելի պաշտոններ են, որովհետև թատրոններում կա հատուկ սպեցիֆիկա, որը երբեք օրենք ընդունող դեբիլները այնպես էլ չեն հասկացել:

Եվ հիշեք, թատրոնի տերն ու տիրակալը թատրոնի կոլեկտիվն է, որի հարկերով ձևավորվում է մշնախի աշխատավարձը»,- գրել է դերասանը:

Ու մինչ այս ամբողջ տեղեկատվությունը փորձում է մարսել հեղափոխական թավշյա էյֆորիայից թացն ու չորն այդպես էլ իրարից չտարբերող հասարակության որոշ հատվածը, Նազենի Ղարիբյանը սրբագրում է իր կենսագրությունը։

«Վիքիպեդիայից» կայծակնային արագությամբ հեռացվում է նրա՝ Ֆրանսիայի քաղաքացիություն ունենալու հատվածը և կախարդական փայտիկի օգնությամբ Նազենի Ղարիբյանը դառնում է միայն ՀՀ քաղաքացի, որ վաղն առավոտյան նախարարության դիմաց օրենքի այդ խախտումով պոստում հայտնվելու համար բողոքի ակցիայի ականատես չլինի։

Սա Ղարիբյանի արդեն որերորդ տապալումն է Մշակույթի նախարարի պարտականությունները կատարողի պաշտոնում, ինչը նաև փաստեց Կոնստանտին Օրբելյանին փոխարինողի հավակնորդ մոդել, դերասան, հաղորդավար և վերջում նաև ժուռնալիստ Արմեն Սարգսյանը։

Գիտակցելով, որ հասարակությունը որևէ կերպ չի ընդունի իր թեկնածությունն այդ պաշտոնում՝ Արմեն Սարգսյանն այսօր կառավարության դիմաց բողոքի ակցիա անող արտիստներին էր միացել և հայտնել, որ Կոնստանտին Օրբելյանի հետ սխալ են վարվել․ մաեստրոյի հետ այդպես վարվելը չի ընդունում՝ հաստատ գիտակցելով, որ թատրոնում իրեն ևս չեն ընդունում և չեն ընդունի։

NEWSPRESS.am