Հայաստանի ՀՆԱ-ն կնվազի մինչև 4,3 տոկոս․ վատ ենք ապրելու

Համաշխարհային բանկը Հայաստանի տնտեսական դրության մասին զեկույց է հրապարակել, որտեղ նշվում է, որ Հայաստանում ՀՆԱ-ն նվազելու է՝ հասնելով մինչև 4,7 տոկոսի, ինչը նշանակում է, որ ավելի վատ ենք ապրելու։ Ուշագրավ է այն, որ զեկույցում անցյալ տարվա սկզբի և վերջի համեմատություն կատարելիս, 2018-ի սկիզբը բավական պոզիտիվ երանգներով է ներկայացվում և ֆիքսվում է, որ անցյալ տարեսկզբին Հայաստանը կարողացել է հասնել տնտեսական վերելքի, ինչը հետագայում ողջ տարվա ընթացքում կամաց-կամաց նվազել է։

Որպես պատճառներ նշվել են՝ արտաքին խթանիչների թուլացումը, արտաքին ներդումների հոսքի կրճատումը, դրամական փոխանցումների հոսքի կրճատումը, ցածր բերքատվությամբ գյուղատնտեսական տարին և տնտեսության առաջատար ոլորտներից հանդիսացող հանքարդյունաբերության ոլորտում առաջացած դժվարությունները, ինչից կարելի է պարզապես ֆիքսել, որ Համաշխարհային բանկի մասնագետները ևս, օրինակ, Ամուլսարի հետ կապված խնդիրը հաշվարկում են որպես Հայաստանի տնտեսական դրության վատացման բաղադրիչ, իր բոլոր հետևանքներով հանդերձ։ Եթե ավելի պարզ ձևակերպենք, ապա ստացվում է այնպես, որ մենք ավելի շատ ներմուծում ենք, քան արտահանում, չնայած, որ արտահանումը ծավալային առումով աճում է, սակայն ներմուծմանը ծածկել չի կարող։

Նույն կերպ էլ դրամական միավորներով արտահայտած երկրի ներսում ստեղծված բարիքը ծավալային առումով չի կարողանում ծախսել արտաքին ֆինանսական հոսքերին, ինչն էլ տնտեսությունը կախված վիճակի մեջ է պահում և այս պայմաններում, որքան էլ պաշտոնապես հայտարարվի տնտեսական հեղափոխության մասին, օբյեկտիվ իրականության տեսակետից այն իրականացնել հնարավոր չէ, հատկապես երբ արտաքին պայմանները միտված են բացասաբար ազդելու, հետևաբար Հայաստանի տնտեսությունը կշարունակի շատ զգայուն լինել, օրինակ, ռուսական տնտեսության հանդեպ։

NEWSPRESS.am