Վիեննան` ընդդեմ մեկ քայլ այն կողմ գտնվող պատերազմի

Արցախում կայացած Հայաստանի և Արցախի համատեղ անվտանգության նիստից հետո, վարչապետ Փաշինյանն այսօր հանդիպելու է Ադրբեջանի նախագահի հետ։

Հիշեցնենք, որ շաբաթներ առաջ Ստեփանակերտում՝ Հայաստանի ու Ղարաբաղի Անվտանգության խորհուրդների համատեղ նիստում Փաշինյանը պնդել էր՝ Արցախը պետք է վերադառնա բանակցային սեղան, իսկ Բաքուն մերժել էր այդ առաջարկը:

Իսկ ինչ վերաբերում է այսօր Ավստրիայում կայանալիք հանդիպմանը, Փաշինյանը հայտարարել էր, որ Ալիևի հետ իր հանդիպումից առայժմ միայն մտքերի փոխանակում է ակնկալում:

«Նախկինում էլ Ադրբեջանի նախագահի հետ մեր քննարկումներում ես ասել եմ իմ դիրքորոշումը. կարծում եմ, որ սկզբնական փուլում առնվազն էդ հանդիպումները կոնկրետ օրակարգ պետք է չունենան, պետք է լինի հարցերի շուրջ, և մենք մտքեր փոխանակենք տարբեր, մեզ հուզող հարցերի շուրջ»,- ասել է Փաշինյանը:

Մինչ Փաշինյանը խոսում է մտքերի փոխանակման մասին և արդեն որերորդ անգամ Ադրբեջանի նախագահի հետ հանդիպման է գնում առանց օրակարգի, օրակարգային մի կարևոր հարցի մասին բարձրաձայնում Ժիրայր Սեֆիլյանը։

Նա անդրադարձել է այսօր Վիեննայում կայանալիք Փաշինյան-Ալիև հանդիպմանը ու ՀՀ վարչապետին առաջարկել որպես նախապայման ներկայացնել Ապրիլյան քառօրյայի ժամանակ Ադրբեջանի ռազմական հարձակմամբ խախտված հրադադարի գծի վերականգնման պահանջը:

«Նիկոլ Փաշինյանին առաջարկում եմ՝ այսօր Վիեննայում որպես նախապայման ներկայացնել Ապրիլյան քառօրյայի ժամանակ Ադրբեջանի ռազմական հարձակմամբ խախտված հրադադարի գծի վերականգնման պահանջը։ Հակառակ պարագայում, եթե բանակցությունները վերսկսվեն հրադադարի խախտված գիծը որպես իրողություն ընդունելու մեկնակետից, ինքնաբերաբար լեգիտիմացվելու են Ապրիլյան քառօրյայի սանձազերծումն ու դրա հետևանքները, ինչպես նաև խրախուսվելու է նման գործելակերպն առհասարակ՝ խթանելով սպառազինությունների մրցավազքը, նորանոր Ապրիլյան քառօրյաները, տարածաշրջանի ապակայունացումը, ստեղծելով լայնածավալ պատերազմի ռեալ սպառնալիք»,- գրել է նա:

Տեսականորեն Սեֆիլյանը բարձրաձայնում է շատ կարևոր խնդիր, բայց արդյոք Փաշինյանն այն կկարողանա՞ բարձրաձայնել Ալիևի հետ հանդիպման ժամանակ, իսկ ներկա կետում բանակցային գործընթաց սկսելը նշանակում է համակերպվում կորցրած հեկտարների հետ։

Գործնականում, Փաշինյանը պետք է գոնե Ալիևի հետ մտքերի փոխանակման փուլում շրջանառի այս հարցը, հետագայում այն բանակցային օրակարգ մտցնելու համար։

Կկարողանա՞, թե՞ ոչ, կերևա հանդիպման ավարտից և դրա վերաբերյալ արդյունքների հանրայնացումից հետո։

ՀՀ վարչապետն այս անգամ գոնե պետք է հաջողություն արձանագրի մտքերի փոխանակման փուլում, որպեսզի սրբագրի Արցախի բանակցային հարցում իր կողմից թույլ տրված սայթաքումները։

NEWSPRESS.am