«Քուչեքում պպզողները» դարձան պաշտոնյա, իսկ կրթվածները՝ էժան աշխատուժ

Այսօր Ազգային ժողովում պատգամավորները հարցեր էին ուղղում վարչապետ Նիկոլ Փաշինյանին՝ Կառավարության ծրագրի կատարման ընթացքի և արդյունքների մասին զեկույցի ընթացքում:

Պատգամավորներից մեկի հարցին ի պատասխան Փաշինյանը մի արտահայտություն արեց, որը տեսականորեն ճիշտ է, սակայն գործնականում հայաստանյան իրականության հետ աղերս չունի:

Մեջբերում եմ՝ «Այս երկրում հիմա էլ սկսել են թշնամի համարել բարձր աշխատավարձ ստացող մարդուն, ո՞ վ է, այդ մարդը: Դա այն մարդն է, ով առավոտից իրիկուն գնացել է համալսարան, դարձել բարձր մակարդակի պրոֆեսիոնալ և ստանում է 1 մլն դրամ աշխատավարձ: Էդ մարդը քուչեքում չի պպզել, կրթություն է ստացել, հիմա էդ մարդուն ասում ենք՝ արի ստե հլը, 2 մլն դրամ աշխատավարձ ես ստանո՞ւմ, 30 տոկոս դնենք, աշխատավարձիդ կեսը վերցնենք»:

Երկու նկատառում այս պնդման վերաբերյալ. նախ՝ Հայաստանում այդպես էլ աշխատավարձի շեմն էականորեն չի բարձրանում: Եթե համարենք, որ մրցունակ կադրերով պետք է համալրված լիներ պետական ապարատը, կարող ենք ասել, որ մեր կրթված, ինտելեկտուալ խավը հանգրվանել է պետական սեկտորում, իսկ ի՞նչ ենք տեսնում այնտեղ: Աշխատավարձի պահումներից հետո այդ կրթված, դիպլոմ ստացած, «քուչեքում չպպզած» կինը կարող է ինչ-որ ՊՈԱԿ-ում ստանալ 70.000 դրամ աշխատավարձ: Այս պատկերը հեռու չէ նաև մասնավոր սեկտորից: Եթե, համարենք, որ մասնավորում աշխատավարձերը ավելի բարձր են, ապա պետք է ուշադրություն դարձնել պահանջներին՝ լեզուների իմացություն, համակարգչային ծով գիտելիքներ, աշխատանքային ժամերի ոչ ստատիկություն, 6-օրյա աշխատանքային ռեժիմ, մի խոսքով՝ շատ աշխատելով մի փոքր շատ է վաստակում մարդը, բայց ինչ է ստացվում՝ կրկին հանգում ենք էժան աշխատուժին:

Այո՛, հայաստանում այսօր էժան աշխատուժ է անգամ բարձրագույն ուսումնական հաստատության կողմից որակավորված երիտասարդ կադրը:

Հաջորդ նկատառումը՝ ովքե՞ր են այսօր նախարար, փոխնախարար, պատգամավոր, մարզպետ, քաղաքապետ, ավագանի՝ մեծամասամբ, քիչ բացառություններով, «քուչեքում պպզող դեմքեր», ովքեր ռեմբրենդիգից հետո դարձել էին պարապ ակտիվիստներ ու քայլիստներ: Ի՞նչ է ստացվում՝ մարդը տքնել է, կրթվել, դիպլոմ ստացել, բայց պաշտոն է ստացել միտինգ անողը, և անգամ դիպլոմ ունենալուց ու կրթվելուց խոսում է մարդ, ով հասել է վարչապետի պաշտոնին առանց դիպլոմի, իսկ կրթություն ստանալու ցանկության առումով էլ առանձնապես աչքի չի ընկել:

Իսկ ի՞նչ անի այսօր «սոված ուսանողը», ով ավարտելուց հետո ստանալու է 80.000 դրամ աշխատավարձ, քանի որ պաշտոնները զբաղված են քայլիստների կողմից:

Ի դեպ, հարց Փաշինյանին՝ ինչքա՞ն եք վճարել Ձեր խմբագրության աշխատակիցներին և ինչքանո՞վ եք այն բարձրացրել տարիների ընթացքում: Հետահայաց է պետք նետել և չկտրվել հայկական իրականությունից:

NEWSPRESS.am