Թրամփը սիրաշահում է Թուրքմենստանին ու Բաքվին. ի՞նչ զարգացումներ սպասել Արցախում

ԱՄՆ նախագահ Դոնալդ Թրամփը Թուրքմենստանի նախագահ Կուրբանկուլի Բերդիմուհամմեդովին շնորհավորել է Նովրուզ Բայրամի առիթով։ Ինչպես հայտնում է «Нейтральный Туркменистан» թերթը, շնորհավորական ուղերձում Սպիտակ տան ղեկավարը հույս է հայտնել, որ Կասպից ծովի կարգավիճակի հստակեցման և վերջինիս կարգավիճակի հետ կապված ստորագրված կոնվենցիայից հետո Թուրքմենստանի համար լավ հնարավորություններ են բացվում իր գազը հասցնել մինչև Արևմուտք՝ Եվրոպա։

Նովրուզ Բայրամի վերածնունդի և զարթոնքի խորհուրդը կապելով նոր հնարավորությունների ստեղծման հետ՝ Թրամփը նկատել է, որ ամերիկյան գործարար շրջանակները նոր հնարավորություններ են փնտրում Թուրքմենստանի հետ առևտրա-տնտեսական կապերի խորացման համար։ Ադրբեջանական մամուլն այս շնորհավորանքը ոչ պակաս ոգեւորությամբ է տիրաժավորում, քան թուրքմենական մամուլը։ Ինքնին հասկանալի է պատճառը։

Թուրքմենստանն իր գազը կարող է հասցնել Եվրոպա՝ Ադրբեջանի տարածքով տարանցում կատարելով։ Դա Ադրբեջանի համար ռազմավարական նշանակություն ունեցող ՏԱՊ և ՏԱՆԱՊ գազատարների ծրագիրն է, որ, ըստ էության, կյանքի է կոչվում և որը նաև Հայաստանի ռեգիոնալ մեկուսացումը խորացնող նախագծեր են, և հավելյալ գործիքներ Երևանին ճնշելու։ Դժվար է ասել, որ Կուրբանկուլի Բերդիմուհամմեդովին նման սիրալիրությունների տակ Սպիտակ տանը չեն հաշվարկել այս հանգամանքը։ Հատկապես Նիկոլ Փաշինյանի իրանական այցից հետո պարզ է, որ ԱՄՆ-ն այդ «հանդգնությունը» նույնիսկ Բոլթոնի նախազգուշացումն անտեսելով իրականացնելը չի թողնի անպատասխան։ Այս ծրագիրը Եվրոպայի գազային դիվերսիֆիկացիային միտված ծրագիր է նաև, որն իր սուր ծայրով ուղղված է Մոսկվայի դեմ, քանի որ Մոսկվայի համար գազը նաև աշխարհաքաղաքական լուրջ խաղաքարտ է։

Հասկանալի է, որ եթե հանկարծ սկսվի այն, ինչին ձգտում է Թրամփը, Մոսկվան խառնվելու է ու օգտագործելու է իր ազդեցության լծակները։ Ու այս առումով, լիովին հնարավոր է, որ «Ղարաբաղյան խաղաքարտը» կրկին խաղարկվի։ Բաքվի համար սա զսպող հանգամանք է, ու ամենայն հավանականությամբ ինչ-որ գործարք կկայանա Բաքվի և Մոսկվայի միջեւ։

Փաշինյան-Ալիև հանդիպման շեմին, սա լուրջ մտածելու թեմա է, քանզի հարցերի հարցն է այն, թե ինչ է Մոսկվան դնելու խաղատախտակին Բաքվի հետ գործարքի գնալիս ու այդ «խաղատախտակին դրածում» ինչ մասնակցություն է ունենալու Ղարաբաղյան կարգավորման խնդիրը։

NEWSPRESS.am