Եկավ նաև Փաշինյան-Ալիև հանդիպման ժամանակը

Ռուսական ՏԱՍՍ լրատվական գործակալությունը, վկայակոչելով Ավստրիայի նախագահ Ալեքսանդր վան դեր Բելլենի գրասենյակի տարածած հայտարարությունը, հայտնում է, որ մարտի 29-ին Ավստրիայի նախագահը Հոֆբուրգի իր նստավայրում կընդունի Հայաստանի վարչապետ Նիկոլ Փաշինյանին և Ադրբեջանի նախագահ Իլհամ Ալիևին։ Ընդ որում, ըստ նույն հրապարակման, նախագահ վան դեր Բելլենը նախ կհանդիպի Հայաստանի վարչապետին, որից հետո՝ Ադրբեջանի նախագահին։

Սա նշանակում է, որ առնվազն մարտի 29-ին կամ հաջորդող երկու օրերին տեղի է ունենալու Հայաստանի և Ադրբեջանի ղեկավարների՝ երկար սպասված հանդիպումը, որի մասին այդքան խոսվել էր այս ամիսների ընթացքում և մինչև վերջ դեռ դժվար է հստակ ասել, թե ինչ կլինի։ Այսպիսով, եթե այս հայտարարությունից ենք դատում, հանդիպումը լինելու է Ավստրիայի մայրաքաղաք Վիեննայում։ Ինչ խոսք, դժվար հանդիպում է լինելու բովանդակային առումով։ Այս ընթացքում արդեն պարզ է դարձել, որ Ալիևը մտադրություն չունի իր դիրքերը մեղմացնելու։ Երևանն էլ գրեթե մի տարի անիմաստ վատնել է անհասկանալի մանևրերի վրա, շնորհիվ Փաշինյանի «փայլուն դիվանագիտության»։ Գոնե մինչ այս եղած վերջին մեկ տարվա և հատկապես վերջին մեկ- երկու ամսվա հայտարարությունները, որոնք հնչել են Բաքվից, Երևանից, Ստեփանակերտից կամ համանախագահներից, խոսում են այն մասին, որ տեղաշարժերի հույս ունենալ պետք չէ, և հարցն ավելի շատ կվերաբերվի բովանդակային մասով դիրքորոշումների հստակեցմանն ու տարընթերցումների հավանականության նվազեցմանը՝ այն, ինչ Փաշինյանն անվանում է «վերընթերցում»։

Ուշագրավ է, որ այսօր արտահերթ նիստ է ունեցել ՀՀ կառավարությունը՝ Փաշինյանի գլխավորությամբ, նիստ է ունեցել նաև ԼՂՀ կառավարությունը, որը վարել է Բակո Սահակյանը։

Հասկանալի է, որ հայկական երկու մայրաքաղաքներում էլ հիմա, այսպես ասած, «նախապարահանդեսային վերջին պատրաստություններն են տեսնում», որից հետո շատ բան ի վերջո կպարզաջրվի, երևի թե։

NEWSPRESS.am