Կյանքը բեմ է, Փաշինյանը՝ չստացված դերասան

Այսօր համապետական շաբաթօրյակ էր: Երկիրն աղբից մաքրելու կարևոր գործին էր լծվել մի ողջ ժողովուրդ: 

Շատերն իրենց գյուղն ու քաղաքն աղբից մաքրեցին առանց ի ցույց դնելու, լուռ, շատերը՝ ի ցույց դնելով. նկարվեցին, սելֆիներ արեցին ու ֆեյսբուքը ողողեցին իրենց մաքրամաքուր ստատուսներով:

Այս երկրորդ խմբի շատերից ետ չմնացին նաև մեր պաշտոնյաները, բայց այն, ինչ արեց վարչապետ Փաշինյանը, դուրս է որևէ տրամաբանությունից. ավելին՝ զուրկ է դրանից:

Այսօր առավոտվանից մեկնարկած համապետական շաբաթօրյակին վարչապետ Փաշինյանը ներկայացավ կոստյումով և սպիտակ վերնաշապիկով:

Փաշինյանին աջից ուղեկցում էր նրա բահ բռնողը, ձախից՝ աղբի տոպրակ պահողը, դե հետևից էլ մի տասը հոգի ապահովում էին նրա անվտանգությունը:

Փաշինյանին ուղեկցում էին նաև տասնյակ լրագրողներ ու օպերատորներ: Տեսախցիկների առաջ վարչապետը թարս հագած ձեռնոցներով մի տեղում գետնին թափված աղբն էր վերցնում, մեկ այլ տեղում՝ կոստյումով հրում էր «Սանիթեք»-ի աղբամանը, երրորդում՝ կռանում և մեծահոգաբար վերցնում գետնին թափված ծխախոտի մնացորդները:

Հայաստանը աղբից մարքելուն զուգընթաց, Փաշինյանը չէր մոռանում լրագրողներին ու ուղիղ եթերները. ամեն վայրկյան շփվում էր լրագրողների հետ, պատասխանում հարցերին և իր շատախոսությամբ անհարմար դրության մեջ դնում այն լրագրողներին, ովքեր պետք է ֆիքսեն Փաշինյանի ամեն մի տառը, բառն ու կատարած քայլերը՝ հոգու խորքում կրկնելով.

«Դե լավ էլի, հերիք է, ինչքան է շարունակվելու այս բեմադրությունը:
Ու այսպես, ուղիղ եթերների, աղբի տոպրակ բռնողների, իր թիկունքն ամուր պահողների, կնոջ, երեխաների ուղեկցությամբ Փաշինյանը մաքրեց Հայաստանը: Սա իսկապես ողջունելի կլիներ, եթե մեր վարչապետը նույն մաքրությունն աներ առանց այդ մասին գոռալու, ի ցույց դնելու, ֆեյսբուքով ուղիղ եթեր ապահովելու. չէ՞ որ մաքրություն յուրաքանչյուրս անում ենք ինքներս մեզ և ոչ թե ուրիշների համար: Կարելի էր մաքրել տունն ու բակը, մեր Հայաստանն ու մեր հոգին՝ առաջին հերթին մեզ, և ոչ թե մեդիայի և PR-ի համար: Իսկ այն, ինչ արեց Փաշինյան Նիկոլն այսօր, ընդամենը չստացված բեմադրություն էր՝ լի անտաղանդ դերասաններով:

NEWSPRESS.am