Այ ընկեր, ինձի մի լոլո կարդա դու. քաղաքացին՝ Մարությանի մամուլի խոսնակ Կարապետյանին

Այսօր՝ մարտի 23-ի համապետական շաբաթօրյակի ժամանակ Երևանի քաղաքապետ Հայկ Մարությանին քաղաքացիներ էին մոտենում, ոչ թե միանալու մաքրության աշխատանքներին, այլ դիմելու իրենց խնդիրներով:

Տարեց մի քաղաքացի նկատեց, որ քանիցս դիմել է քաղաքապետարան, սակայն իրեն չեն ընդունել, ասել են, որ պետք է համակարգչով նամակ ուղարկի:

«Էդ մարդը կայք չունի, կոմպյուտեր չունի. ասենք 80 տարեկան կին ա, չի հասկանում կամպյուտր՝ ո՞նց գնա ուղարկի: Էնտեղ 50 հատ պարազիտ կա, հիմա չեմ ուզում էդ հարցերի շուրջ խոսեմ, նրանցից մեկին հանձնարարեք, թող զբաղվեն քաղաքացու հարցերով»,-Մարությանին ասաց քաղաքացին:

«Բայց պարտադիր չէ նամակ գրեն, կարող են զանգել»,-ասաց ՄԱրությանը, ապա շրջվելով դեպի իր մամուլի խոսնակ Հակոբ Կարապետյանին՝ հարցրեց. «Կարող են, չէ՞»: Ինչի Կարապետյանը դրական արձագանքեց:

«Այո, կարող են, կարող են նաև ուղղակի նամակ գրել»,-ասաց նա:

Քաղաքացին զայրացավ. «Այ ընկեր, ինձի մի լոլո կարդա, նամակը գրում ենք, թաքցնում են, անհայտացնում են, ոչ մի միջոց ձեռք չեն առոնւմ»,-ասաց տղամարդն ու խնդրեց ինչ-որ մեկին հանձնարարել, որպեսզի զբաղվի այդ գործով:

«Արդեն հանձնարարել եմ»,-ասաց Մարությանը:

«Ո՞ւմ»,-զարմացած արձագանքեց քաղաքցին:

«Հակոբ Կարապետյանին. արդեն 5 րոպե ուզում ա ասի, որ կզբաղվի՝ չեք լսում»,-ասաց Մարությանն ու հեռացավ: