Փաշինյանը փորձում է «փրկել իր դեմքը»

ՀԱՊԿ գլխավոր քարտուղարի ժամանակավոր պաշտոնակատար Վալերի Սեմերիկովը ռուսական ՏԱՍՍ գործակալության հետ զրույցում հայտարարել է, որ ՀԱՊԿ նոր գլխավոր քարտուղարի նշանակման համար անհրաժեշտ բոլոր փաստաթղթերն ուղարկվել են անդամ պետություններին դեռ անցյալ տարվա դեկտեմբերին։ Սեմերիկովը նաև հավելել է, որ այդ փաստաթղթերի համար չկա ժամկետայնության ռեգլամենտացիա, ինչը նշանակում է, որ դժվար է ասել, թե դրանք երբ բոլոր պետությունները կստորագրեն ու կուղարկեն հետ՝ ՀԱՊԿ կենտրոնակայան։ Հետևաբար, Սեմերիկովը չի կարողացել ասել նաև, թե երբ կնշանակվի ՀԱՊԿ նոր գլխավոր քարտուղարը, որը այս դեպքում Բելառուսի թեկնածուն է լինելու։

Հիշեցնենք, որ ՀԱՊԿ-ում նախկին գլխավոր քարտուղար Յուրի Խաչատուրովի մասով կատարվածից հետո, բավական լուրջ ճգնաժամ է ստեղծվել և ժամանակ առ ժամանակ այս մասին բարձրաձայնվում է։ Ըստ ընդունված ռոտացիոն կարգի՝ հաջորդ երկիրը Բելառուսն է, ով առաջարկել է իր թեկնածուին, ի դեմս այդ երկրի Անվտանգության խորհրդի քարտուղար գեներալ Ստանիսլավ Զասի։ Զասի թեկնածությունը հաստատել են բոլոր անդամ պետությունները, բացի Հայաստանից։ Գեներալը այս ընթացքում հասցրել է հանդիպել բոլոր անդամ պետությունների հետ (այդ թվում՝  Ռուսաստանի նախագահ Վլադիմիր Պուտինի), բացի Հայաստանի վարչապետ Նիկոլ Փաշինյանից։ Զասը մի քանի անգամ ակնարկել և ուղիղ կերպով առաջարկել է Փաշինյանի հետ հանդիպման մասին, սակայն Երևանի ամենից քաղաքավարի պատասխանը եղել է այն, որ Երևանն այժմ դեռ պատրաստ չէ այդ հանդիպմանը։ Իր վերջին ասուլիսին Փաշինյանը կարծես թե վերահաստատեց իր կեցվածքը, կապված գլխավոր քարտուղարի մանդատի պատկանելության հետ, և կրկին ասպարեզ բերվեց այս բավական խճճված թնջուկը։

Իրավիճակը, կարելի է ասել, դառնում է անհեթեթ։ Երևանի համար հիմա կարծես թե, մեղմ ասած, ժամանակ ձգելու և մանդատի լրանալուն հասնելու խնդիր դրված լինի։ Պարզ է, որ եթե վաղն էլ կոնսենսուս կայանա, որ այո, կարելի է, որ Երևանը նորից իր թեկնածուին առաջարկի, միևնույնն է՝ վեց-յոթ ամսվա ընթացքում, ինչպես մի առիթով նկատել էր Բելառուսի նախագահ Ալեքսանդր Լուկաշենկոն, այդ նոր թեկնածուն եթե հաստատվի էլ բոլորի կողմից, չի կարողանալու շրջել բոլոր անդամ երկրներով և ծանոթանալ ՀԱՊԿ-ի կառույցներին առհասարակ։

Եթե ավելի խորանանք հարցի մեջ, ապա Փաշինյանը հիմա փորձում է «դեմքը փրկելու» քաղաքականություն վարելով, հարցը բերել բնական հանգուցալուծման, քանի որ հասկացել է անշուշտ, որ ՀԱՊԿ-ում «եփված ճաշի» խոհարարը ինքն է ու պատասխանատվությունն այս դեպքում իրենն է։ Սովորության համաձայն, խուսափելով պատասխանատվությունից, նա չի ստորագրում ուղարկված թղթերը։ Թե ինչպես է հարցը լուծվելու, արդեն հասկանալի է՝ պետք է մինչեւ տարեվերջ Սեմերիկովը շարունակի կատարել ժամանակավոր պաշտոնակատարի՝ իր պարտականությունները, մինչև Հայաստանի մանդատի ժամկետը լրանա։ Սակայն կա հարց, իսկ արդյո՞ք ՀԱՊԿ-ում կներեն Փաշինյանին իր անհասկանալի վճռականությունը։

NEWSPRESS.am