Արմեն Սարգսյանի դիրքերը սկսել են ամրապնդվե՞լ

Այն, որ Հայաստանի նախագահ Արմեն Սարգսյանի և վարչապետ Նիկոլ Փաշինյանի հարաբերությունները բավական լարված են, անուղղակի կերպով հաստատել է հենց Փաշինյանը։ Հիշեցնենք, որ իր վերջին ասուլիսի ժամանակ Փաշինյանը հայտարարություն է արել՝ կապված Արմեն Սարգսյանին Ստեփանակերտում ԱԽ նիստի հրավիրման հետ, որից պարզ է դարձել, որ թույլ են տվել արարողակարգային լուրջ սխալներ, ինչն էլ պատճառ է դարձել, որպեսզի նախագահ Սարգսյանի գրասենյակը հայտարարի, որ նախագահը չի մասնակցելու ԱԽ նիստին։

Սակայն դրանից էլ դեռ շուտ երկու գործչի միջև հակասությունները նկատելի էին։ Դեռ այն պահից սկսած, երբ առաջին խոսակցություններն սկսվեցին կրկին նախագահական կառավարման համակարգին վերադարձի, սուպերվարչապետական համակարգից հրաժարվելու և Սահմանադրության հնարավոր փոփոխության մասին, Փաշինյանն իր «լայվ»-երից մեկում բավական թափանցիկ հայտարարել էր, որ եթե սուպերվարչապետությունից հրաժարվի էլ, ապա լիազորությունները կփոխանցվի պառլամենտին և ոչ երբեք նախագահին, քանի որ այդ դեպքում ըստ Փաշինյանի կստացվի որ երկիրն ունի երկու ղեկավար, ինչը կլինի կործանարար։

Հիմա ամեն բան կարծես ավելի է սրվում։ Փաշինյանը շատ կուզեր, որ ունենա հնարավորություն թեկուզ իր զոմբիների բանակին Արմեն Սարգսյանի վրա ուղղելով՝ հասներ նրա հրաժարականին, սակայն նաև հասկանում է, որ դրա հիմքերը նա չունի և երբեք էլ չի ունենա, քանի որ նախ Արմեն Սարգսյանի լեգիտիմությունը ճանաչել է անձամբ և հրապարակայնորեն այն օրերին դեռ, երբ իշխանափոխություն էր իրականացնում, և հիմա այս առումով կասկածներ հայտնելը կարող է բացարձակապես այլ ընկալումների և մեկնաբանությունների առիթ տալ, ինչպես «ներսում», այնպես էլ հատկապես «դրսում», որտեղ իր դիրքերը բոլոր ուղղություններով խախուտ են։

Բացի այդ, և՛ Փաշինյանը, և՛ նրա թիմը լավ են հասկանում, որ հիմա Արմեն Սարգսյանի դիրքերը շատ ուժեղ են և՛ «ներսում», և՛ «դրսում»։ Վերջին օրերին դրանում կարծես թե համոզվում են երկու դրվագով։

ԱՄՆ նախկին փոխնախագահ Ջո Բայդենը նախօրեին հայտարարեց, որ առաջադրվելու է ԱՄՆ 2020 թվականի նախագահական ընտրություններում։ Ավելին՝ նա արդեն սկսել է նախընտրական քարոզչության համար անհրաժեշտ գումարի հանգանակությունը և արդեն մի քանի մեծահարուստ Բայդենի շրջապատից, ըստ Washington post-ի տեղեկացման, երևի թե նվիրաբերություններ անեն։ Սա այն նույն Ջո Բայդենն էր, որի հետ Արմեն Սարգսյանի կարճ խոսակցությունը դարձավ նախերգանքը Բայդենի առաջադրման «նուրբ խաղի» և որը բացահայտեց, որ Բայդենի հետ Սարգսյանն ամենևին էլ միայն «Ֆեյսբուքի ֆրենդներ չեն»։

Մյուս դրվագն արդեն կապված է հետսովետական տարածքի հետ։ Հայաստանյան հասարակությանն այնքան ուրախություն պարգևած Ղազախստանի առաջին նախագահ Նուրսուլթան Նազարբաևի հրաժարականից հետո, երբ այդ երկրի պառլամենտի նախագահ դարձավ նրա դուստրը՝ Դարիգա Նազարբաևան, հենց ղազախստանցի քաղաքագետները և վերլուծաբանները հայտարարեցին, որ նա էլ ստանձնելու է երկրի ղեկը, իսկ ներկայիս նախագահ Տոկաևն ընդամենը ժամանակավոր կամ անցումային լիդեր է լինելու, իշխանության տրանզիտում։ Դարիգա Նազարբաևան համարվում է Արմեն Սարգսյանի վաղեմի բարեկամներից մեկը, ում հետ, ըստ մամուլի հրապարակումների, առկա են նաև համատեղ բիզնես շահեր։ Ղազախստանն ունի բազմաթիվ անտեսանելի լծակներ ազդելու Կրեմլի վրա և այս ամենի ամբողջության մեջ կարելի է հասկանալ, որ Փաշինյանը հետագայում իր վիճակն արտաքին աշխարհում էլ ավելի չծանրացնելու համար պետք է շատ զգույշ գործի Արմեն Սարգսյանի հետ պայքարի հարցում, հատկապես, որ նիկոլական զոմբիները ո՛չ քաղաքական, ո՛չ իրավական կատեգորիա չեն համարվում Մեծ քաղաքականության մեջ։

NEWSPRESS.am