Երբ է մեկնարկելու «Փրկենք Նիկոլի վարկանիշը» օպերացիան

Հայաստանյան մամուլում ժամանակ առ ժամանակ շրջանառվում են տեղեկություններ այն մասին, որ գործող իշխանությունների վարկանիշը սկսել է ընկնել, ինչը իշխանությունների լուրջ մտահոգությունն է հարուցել։ Ըստ ամենաթարմ տեղեկությունների, ներկայումս իշխանությունների վարկանիշը տատանվում է 53-55 տոկոսի միջև։

Հասկանալի է, որ 90 և ավելի տոկոսի հանրային վստահության ցուցիչի վրա իր գործունեությունը սկսած կառավարության համար 10 ամսում մոտ 40 տոկոսի անկում գրանցելը լուրջ խնդիր է։ Ասում են, որ նույնիսկ Փաշինյանն իրեն հավատարիմ PR մասնագետների հետ մշակում է վարկանիշի պահպանման ռազմավարություն։ Եթե նայենք այս ամենին զուտ քաղաքագիտական տեսակետից, ապա լրիվ նորմալ է, որ իշխանությունը փորձում է պահպանել իր վարկանիշը և հանուն դրա որոշակի քաղաքական տեխնոլոգիաներ է օգտագործում։ Սակայն նույն երևույթը բերելով Հայաստան և տեղայնացնելով հայաստանյան իրականության վրա` առաջանում է հետևյալ հարցը, իսկ ի՞նչ տեխնոլոգիաներ է հնարավոր, որ սկսեն կիրառել նիկոլականները հանուն Փաշինյանի վարկանիշի պահպանման։

Կրկին դիմելով ընդունված միջազգային պրակտիկային, սովորաբար, դրա համար իրականացվում են ինչ-ինչ բարեփոխումներ, մատնացույց են արվում նախընտրական կատարված խոստումները, արձանագրում տնտեսական աճի մասին տվյալները և մատուցվում հասարակությանը։ Կա նաև մեկ այլ տարբերակ, օրինակ, որոշ տեխնոլոգիաների օգտագործումով հասարակությանը սթրեսային վիճակի բերելը և այդ ալիքի վրա դիվիդենդներ շահելը։ Փաշինյանի գոնե վարչապետական գործունեության ժամանակ, ցավոք, հենց այս մեթոդն է ամենից շատը կիրառվել։ Ուստի ամենևին էլ չի բացառվում, որ այսպես ասած՝ «Փրկենք Նիկոլի վարկանիշը» օպերացիայի ընթացքում կրկին փորձ արվեն, օրինակ, կրկին դիմել «մասկի շոուների»՝ ԱԱԾ, ոստիկանություն և այլ ուժայիններ դերակատարներին ներգրավելով կամ էլ փորձեն «մեղավորության կանխավարկածի» օգտագործումով փողեր «վազվրատ» անել։

Իրավիճակը շատ բարդ է հատկապես մարզերում և այս համատեքստում հնարավոր է հիմնական գործողությունների թատերաբեմ դառնան մարզերը, որտեղ կարող են հանկարծակի գործեր հարուցվել, աղմկոտ բացահայտումներ արվել, ճանաչված և ազդեցիկ մարդկանց ներքաշել այդ ամենի մեջ և տալով մի կողմից հանրային հնչեղություն այդ գործողություններին, հասարակության շրջանում սթերս առաջացնել ու վերջինիս ալիքի վրա Փաշինյանին ներկայացնել որպես ժողովրդի ունեցվածքի անխոնջ ու խրոխտ մարտիկներ, այդպիսով գոնե մի քանի ամսով դանդաղեցնելով նրա հանրային վստահության վարկանիշի սրընթաց անկումը։

NEWSPRESS.am