Տնով լծված են մեկ նպատակի

Վարչապետ Փաշինյանի դուստր Մարիամն «Ազատության» եթերում է հայտնվել, հարցազրույց տվել ու պատմել քաղաքականության նկատմամբ իր հետաքրքրությունների մասին։ Փաշինյանի դուստրն իր հետաքրքրությունների պատճառը հիմնավորել է նրանով, որ հոր կողմից քաղաքական վայրիվերումներն իր կյանքում մեծ ազդեցություն են թողել։
«2008-ից 2011 թվականներին շատ դժվար է եղել մեզ համար, բայց ես գիտակցում եմ, որ մեր ընտանիքը միայն մեկն էր այն հազարավոր ընտանիքներից, ովքեր իրոք շատ դժվարությունների միջով են անցել, այսինքն՝ շատ ընտանիքների հայրեր ստիպված են եղել լքել երկիրը, շատ ցավով եմ մինչև հիմա հիշում ու մտածում, որ 2008 թվականին նաև 10 զոհ ենք ունեցել, այսինքն՝ շատ ընտանիքներ իրենց զավակներին են կորցրել։ Հիմնականում հիշում եմ ոստիկանության կոպտությունը ցուցարարների հանդեպ, նաև հիշում եմ իմ սարսափը, երբ զինված մեծահասակ աշխատակիցներն Ազգային անվտանգության ծառայության մտնում էին մեր տուն և խուզարկում։ Այնպիսի բաներ են, որ երբեք չեմ մոռանա, ու այդ ժամանակ, քանի որ լրիվ չէի հասկանում, թե ինչ է կատարվում, վախս ավելի մեծ էր»,- իր հուշերն է պատմել Մարիամը։

Իհարկե, «Ազատություն» ռադիոկայանի եթերը Փաշինյանի դստեր համար օգտագործվեց սեփական PR-ն իրագործելու հարթակ, հասարակությունն իմացավ, որ Փաշինյան Մարիամ անուն ազգանունը կարդալուց հետո չեն նրան ընդունել արտասահմանյան բուհ, այլ դրան նա հասել է սեփական ջանասիրության արդյունքում, իսկ թավշյա հեղափոխությանն էլ հետևում էր դրսից, քանի որ թեզի վրա էր աշխատում ուսման վերջին կիսամյակում։

Անշուշտ, Մարիամ Փաշինյանը կարող էր խոսել նաև այն մասին, թե ինչ է ինքը զգում այն ժամանակ, երբ հոր թեթև ձեռքով և թողտվությամբ հասարակությունը բաժանվում է սևերի և սպիտակների, ինչո՞ւ է երկրում շատանում ատելությունը, ինչո՞ւ են հայերն սկսել իրար այսքան շատ ատել, իրար հոշոտել, երկրորդ կարծիք չլսել, ինչու են երկրում օր օրի ավելանում բողոքի ակցիաները և այսպիսի շատ ինչու ինչուներ։

Այս ինչուներին պատասխանելու փոխարեն Մարիամը հիշեցրեց, որ տնտեսական շատ մեծ ցուցանիշներ են արդեն արձանագրվել, շատ մեծ ներգաղթ է արդեն տեղի ունեցել՝ ցանկանալով ի ցույց դնել կառավարության դրական աշխատանքը և հոգ չէ, որ դա չի զգում սովորական շարքային քաղաքացին, ով ինչպես ապրում էր հին Հայաստանում, այնպես էլ շարունակում է ապրել նոր Հայաստանում՝ հիմա, սակայն, արդեն ունեցած վերջին հույսն էլ կտրած։

Իհարկե, այս ցավոտ հարցերի ու թեմաների մասին Մարիամը լռեց, նրան դրա մասին խոսելու հնարավորություն նաև չտրվեց, նման լրջության հարցեր չուղղվեցին, փոխարենը հնչեցին հարցեր, որոնք ավելի շատ հիշեցնում էին հարգանք և խոնարհում առ սիրելի վարչապետի սիրելի դստերը։

Ինչպես հոր դեպքում է՝ նույնը նաև դստեր պարագայում․ ամեն ինչ հանուն սեփական PR-ի, ամեն ինչ պարզապես դափնիներ շահելու համար․ դա է կարևորն այս մարդկանց համար․ հոգ չէ որ ՀՀ քաղաքացին շարունակում է ապրել աղքատ, պարտքերի տակ ճկռած, աչքն արտագաղթի ճանապարհին ու ոչ հպարտ․․․