Սերժ Սարգսյանի կանխատեսումն իրականանում է

ԱԺ պատգամավոր Լուսինե Բադալյանի վերջին ֆեյսբուքյան հայտարարությունն իր բոլոր՝ մոտ երեսուն խմբագրումներով հանդերձ, բավական լայն արձագանք ստացավ հասարակության կողմից և դարձավ սուր քննարկումների և քննադատությունների առարկա, գոնե սոցցանցային տիրույթում։

Կարելի է վստահորեն արձանագրել, որ ի դեմ Լուսինե Բադալյանի՝ նրա «իմքայլական» կոլեգա Թագուհի Ղազարյանը գտել է գաղափարական և ինտելեկտուալ լուրջ համախոհի, այն աստիճան, որ նույնիսկ մի պահի նրանք կարող են մրցակցել իրար հետ, իսկ Գալուստ Սահակյանը պարզապես կարող է վայելել իր վաստակած հանգիստը, քանի որ նրա թողած «սուրբ տեղը» ԱԺ-ում դատարկ չի մնացել։

Այս օրերին կրկին խոսվեց այն մասին, թե որտեղ է հակահեղափոխությունը։ Որոշ փորձագետների կարծիքով՝ հակահեղափոխությունը նախկիններն են, մյուսները կարծում են՝ ավելի նախկինները, իսկ ոմանք էլ գտան, որ հակահեղափոխությունը հենց իշխանության ներսում է։ Իրականում, սակայն հակահեղափոխություն չկա։

Տրամաբանություն էլ չկա հակահեղափոխության, քանի որ հակահեղափոխության մասին, որպես այդպիսին կարելի է խոսել այն դեպքում, երբ կա հեղափոխություն, իսկ Հայաստանում հեղափոխություն չի եղել, եղել է իշխանափոխություն, այն էլ միայն բուրգի վերին մակարդակում։ Իսկ այն, ինչ անվանվում է հակահեղափոխություն, պարզ լեզվով ասած՝ իշխանության վարկանիշի վայրէջքի ֆիքսումն է։ Իհարկե, իշխանավորների կողմից դրա արձանագրումը ցավոտ է, որովհետև ամեն մի տոկոսը, որ նվազում է, մոտեցնում է երեկվա ակտիվիստ այսօրվա ասենք նախարարի կամ փոխնախարարի հեռացման ժամանակը փափուկ նախարարական կյանքից և վերադարձը` ելման դիրքեր։ Իսկ փողն ու իշխանությունը քաղցր բաներ են, այնքան քաղցր, որ մարդիկ երբեմն սեփական կյանքի գնով են պաշտպանել այն։

Պատմությունը բազմաթիվ օրինակներ ունի։ Իսկ ահա Լուսինե Բադալյանի, Թագուհի Ղազարյանի և մյուսների հայտարարությունները, գրառումները մի խոսքով արտահայտած «ճաճանչափայլ» մտքերն «օգնում են», որ մարդիկ ավելի արագ դուրս գան իշխանափոխության էյֆորիայից և ավելի սթափ գիտակցեն, թե ինչպիսի թիմ է հիմա ղեկավարում իրենց։

Ժամանակին, երբ Սերժ Սարգսյանը հեռանում էր, բավական հետաքրքիր կանխատեսում էր արել, ասելով, որ Նիկոլն իր թիմի ձեռն ընկնելու է կրակը և տապալվելու է հենց թիմի մեղքով։ Սերժն աչքի լույս չէ, անշուշտ, բայց կանխատեսումը կարծես թե կամաց-կամաց սկսում է իրականանալ։

NEWSPRESS.am