Կբացահայտվի՞ արդյոք Նիկոլ Փաշինյան-Արմեն Սարգսյան առճակատումը, և ի՞նչ ընթացք այն կունենա

Մինչ Երևանում քանդում էին Օպերայի հարակից սրճարանները, ՀՀ նախագահ Արմեն Սարգսյանն ու առաջին լեդի Նունե Սարգսյանը «թեթև ջազային» քայլվածքով ճանապարհում էին իրենց թանկագին հյուրին՝ Վրաստանի նախագահ Սալոմե Զուրաբիշվիլուն, որն իր այցի ընթացքում հասցրեց նույնիսկ ՀՀ ԱԺ նախագահ Արարատ Միրզոյանի «ականջները ձգել», ցույց տալով, որ էժանագին պոպուլիզմը արտաքին քաղաքականության և դիվանագիտության մեջ տեղ ունի այնքան, որքան փողոցից եկած նորելուկը՝ վերնախավի։

Որքան էլ զարմանալի է, սակայն այս այցը բավական աղքատիկ կերպով լուսաբանվեց մեդիայում, նույնիսկ Հանրայինն այս հարցում որոշակի ժլատություն ցուցաբերեց։ Շատերը կարծեցին, թե սա Զուրաբիշվիլու հայտնի հայտարարությունների հետ է կապված՝ արված Բաքվում, որի մասին արդեն գրել ենք, սակայն հայաստանյան ներքաղաքական զարգացումներից տեղյակ մարդը հասկանում է, որ «շան գլուխը» լրիվ այլ տեղում է թաղված։ Խնդիրն ավելի շատ կապված է Արմեն Սարգսյան-Նիկոլ Փաշինյան՝ դեռեւս խուլ, բայց եփվող հակամարտության հետ, որի մասին մամուլում թեթև ակնարկների տեսքով տարբեր հրապարակումներում արդեն խոսվել է։

Բանն այն է, որ «թիվ մեկ և միակը» լինելու մոլուցքով բռնված Փաշինյանի համար անտանելի է, մեղմ ասած, այն միտքը, որ իր քթի տակ, ի դեմս Արմեն Սարգսյանի, կա մի գործիչ, ով պակաս հավակնություններ չունի և ով անհամեմատ ավելի լավ խաղացող է, քան ինքը։ Միայն այն, որ Արմեն Սարգսյանն, այսպես ասենք, աշխարհի մեծերի շրջանակում ընդունված մարդ է, իսկ ինքը նույնիսկ դեռ Կրեմլում չի ընդունվել նորմալ կերպով, չնայած այն բանին, որ Սիրիա զորք ուղարկեց, որի անձնակազմից արդեն մեկ անձ կա վիրավորված, շատ բան է ասում։

Միաժամանակ, Փաշինյանը հասկանում է նաև, որ Արմեն Սարգսյանը կարող է ապագայում լինել իր համար շատ լուրջ մրցակից։ Ուստի, ամեն կերպ, ըստ շրջանառվող լուրերի, նա փորձում է տարբեր մակարդակների խութեր ստեղծել նրա համար։ Թեև, եթե անկեղծ ասենք, նախագահ Սարգսյանն էլ պակաս խորամանկ գործիչ չէ, և եթե հավատանք որոշ լուրերի, ապա այն, որ Փաշինյանի կառավարությանը բառի բուն իմաստով քարշ են տալու միջազգային արբիտրաժ, դրանում Արմեն Սարգսյանը ամենևին էլ վերջին դերակատարությունը չի ունեցել, և դեռ իր ասելիքը կասի սնամեջ «դըմփդըմփհուիստներին» «կըզըցնելու» իր քայլերում։ Փաշինյանը նաև հասկանում է, որ հիմա դեռ կարող է «զոմբիների ֆյուրեր» կերպարով ինչ-որ կերպ զսպել Արմեն Սարգսյանին, սակայն այն սրընթաց անկումը, որ իր վարկանիշն է գրանցում, ոչ հեռու ապագայում նաև այդ կերպարը չի փրկի իրեն, ուստի էս գլխից է փորձում որքան հնարավոր է՝ նախագահ Սարգսյանին նսեմացրած վիճակում պահել։

Պարզ է, որ առաջիկայում հայաստանյան ներքաղաքական դաշտում սկսվելու է դիրքային պայքարը, որը կարող է և սրանալ, ու այդ ընթացքում, ամենայն հավանականությամբ, նախագահ Սարգսյանի և Նիկոլ Փաշինյանի հակամարտությունն ավելի երևացող կերպով կսկսի ուրվագծվել։

NEWSPRESS.am