Ինչու է ԱԺ-ն ստում, կամ գոնե՝ չի ասում ամբողջական ճշմարտությունը

Արդեն քանի օր է` հայկական մեդիադաշտում պտտվում է մի լուր այն մասին, թե ինչպես է ՀՀ ԱԺ նախագահ Արարատ Միրզոյանը Վրաստանի նախագահ Սալոմե Զուրաբիշվիլու հետ հանդիպման ժամանակ նրա «պորտը դրել տեղը»։

Որպես հիմք այս լուրի` ծառայել է այն դրվագը, որ նախագահ Զուրաբիշվիլու հետ հանդիպման ժամանակ Արարատ Միրզոյանն անդրադարձել է նրա՝ Բաքվում արած հայտարարություններին, որոնք աղերսվում են Ղարաբաղյան հակամարտության հետ։

Այս առնչությամբ ՀՀ ԱԺ պաշտոնական կայքում կարդում ենք․ «ԱԺ նախագահն անդրադարձ է կատարել տարածաշրջանային անվտանգության խնդիրներին: Լեռնային Ղարաբաղի հիմնախնդրի առնչությամբ ՀՀ ԱԺ խոսնակն ընդգծել է, որ մեր երկրի իշխանությունները կողմ են խնդրի խաղաղ բանակցային կարգավորմանը՝ ԵԱՀԿ Մինսկի խմբի համանախագահության ձևաչափում՝ հավելելով, որ Վրաստանը՝ որպես ԵԱՀԿ մասնակից պետություն, միացել է Մինսկի խմբի ձևաչափում կարգավորմանը: «Ուստի, մենք պետք է ջանքեր գործադրենք, որպեսզի հավասարակշիռ ու չեզոք ձևակերպումներն այսուհետ ևս ուղենիշ լինեն Լեռնային Ղարաբաղի վերաբերյալ բոլոր հայտարարություններում»,-ընդգծել է Արարատ Միրզոյանը:

Այս համատեքստում նա իր մտահոգությունն է հայտնել Թուրքիայի, Ադրբեջանի և Վրաստանի արտաքին գործերի նախարարների՝ 2018թ. հոկտեմբերի 29-ի համատեղ հայտարարության վերաբերյալ, որտեղ նշվում էր հակամարտության կարգավորման սկզբունքներից միայն մեկը: ԱԺ նախագահի խոսքով՝ հայ հասարակության շրջանում մտահոգություն են առաջացրել նաև Վրաստանի նախագահի՝ վերջերս Բաքու կատարած այցի ընթացքում հնչած որոշ ձևակերպումներ: Այս առումով, խորհրդարանի ղեկավարն անընդունելի է համարել տարբեր հակամարտությունների համար ընդհանրացված մոտեցումները: Վրաստանի նախագահը, դրական գնահատելով խորհրդարանական դիվանագիտության դերը, նույնպես անհրաժեշտ է համարել երկու երկրների օրենսդիր մարմինների միջև ակտիվ համագործակցությունն ու փոխայցերը:

«Կարեւոր է, որ մեր կայուն հարաբերությունները շարունակում են զարգանալ՝ անկախ քաղաքական ուժերի փոփոխությունից: Մենք՝ որպես հարևան պետություններ, պետք է ունենանք սերտ հարաբերություններ: Այդ կապերը պետք է առավել խորանան և ընդլայնվեն»,- ասել է Սալոմե Զուրաբիշվիլին:

Անդրադառնալով ԱԺ նախագահ Արարատ Միրզոյանի մտահոգություններին՝ Սալոմե Զուրաբիշվիլին ներկայացրել է իր դիրքորոշումը՝ ևս կարևորելով տարածաշրջանի հակամարտությունների բացառապես խաղաղ և միջազգային իրավունքի նորմերին համապատասխան կարգավորումը: Նրա խոսքով` տարածաշրջանի հակամարտությունները խոչընդոտում են համատեղ առաջընթացին:

Իսկ թե ինչու ՀՀ ԱԺ պատկան կառույցը հարկ չի համարել, որպեսզի ներկայացնի, թե որն է արդյոք եղել Սալոմե Զուրաբիշվիլու դիրքորոշումը և միայն նշել է նրա խոսքից մի հատված, որտեղ ընդհանուր, ոչինչ չասող ձևակերպումներ են, պարզ չէ։ Սակայն հարցին լույս է սփռում Վրաստանի նախագահի մամուլի ծառայությունը։ Սալոմե Զուրաբիշվիլու մամուլի գրասենյակը, մասնավորապես, ներկայացրել է Վրաստանի նախագահի պատասխանը, որը ոչ պակաս կտրուկ և հավակնոտ է, կարելի է ասել՝ նաև ավելի կտրուկ և հավակնոտ է, քան Արարատ Միրզոյանի «պորտը տեղը դնելը»։

Վրաստանի նախագահը, մասնավորապես, ասել է հետեւյալը․ «Դուք հիշատակեցիք հակամարտությունների հարցով մեր համագործակցության մասին, դա շատ կարևոր է։ Այդ հակամարտություններն, ամենայն հավանականությամբ, մեր ռեգիոնի համար հանդիսանում են այն խոչընդոտները, որոնք ամենից շատն են արգելակում մեր համատեղ առաջընթացին։ Ինչպես գիտեք, Վրաստանում կա երկու գրավյալ տարածք, և եթե մենք խոսում ենք երկրի շահերի մասին, ապա մեր գլխավոր շահը հանդիսանում է այն, որպեսզի մեր ինքնիշխանությունը և տարածքային ամբողջականությունը ճանաչվի, ընդ որում, ճանաչվի ոչ միայն խոսքով, այլ նաև՝ փաստացի։ Այս տեսանկյունից, շատ ցավալի է, որ պատվիրակություններ են Լեռնային Ղարաբաղից գնում Աբխազիա և «Հարավային Օսեթիա» և դնում այն հարցը, կարծես այդ հակամարտությունը նույն տիպին են պատկանում և փնտրում են ինչ-որ սիմետրիա։ Դա մեզ համար չափազանց տխուր և ցավոտ է։ Մենք կարծում ենք, որ այստեղ այնպիսի բարյացակամություն չկա, որը պետք է լիներ մեր երկրի հանդեպ»։ Այսինքն, եթե ավելի անկեղծ լինենք, հենց Զուրաբիշվիլին է Արարատ Միրզոյանի պորտը տեղը դրել:

NEWSPRESS.am