Իմքայլական դհոլչիները՝ հանուն ապագա քաղաքապետի

Երեկվանից օրվա հերոսը Սերժ Սարգսյանի փեսա Միքայել Մինասյանի սանիկ Վիկտոր Մնացականյանն է՝ Կենտրոն վարչական շրջանի ղեկավարը։

Հենց նա է երեկվանից հսկում Օպերայի հարակից տարածքը, ամենահասարակ շարքային քաղաքացու նման շփվում ոստիկանների, լրագրողների և ցուցարարների հետ։ Հենց Մնացականյանն է բորբոքված ակտիվիստին հանգստացում, տանջվող ոստիկանին՝ շնորհակալություն հայտնում։

Այն, որ Օպերայի տարածքում բողոքի ակցիա անող ցուցարարների երեկվա բողոքն ավելի վատ հետևանքներ չունեցավ, շատերի կարծիքով, հենց մարդամոտ ու շփվող թաղապետի շնորհիվ է։

Կենտրոնի թաղապետի շահերից է, բնականաբար, բխում այս պահին լինել ժողովրդի կողքին, բայց չի բացառվում, որ այդ հոգատարությունն իր տողատակն ունի։ Մարության Հայկի օրերը քաղաքապետի պաշտոնում արդեն հաշվված են, նրան այդ պաշտոնում փոխարինելու համար հասարակության մոտ ձևավորվում է լավ թաղապետի կերպարը․ իսկ լավ թաղապետից քաղաքապետ՝ մեկ կրունկաչափ քայլ է։

Այժմ մեր առջև վեր է խոյանում իսկական պրոֆեսիոնալը, որը ոչ թե Հայկ Մարությանի նման ամենաթեժ իրավիճակներում թաքնվում է, այլ հակառակը՝ հայտնվում հենց այդ թեժ կետերում, կրքերը հանդարտեցնում։

Այո՛, Մնացականյան Վիտյան ձևավորվում է որպես Երևանի ապագա քաղաքապետ, իսկ նրան այդ հարցում աջակցում են իմքայլական որոշ դհոլչիներ;

Օրինակ, Ազգային ժողովի նախագահ Արարատ Միրզոյանն այսօր շտապել է իր ֆեյսբուքյան էջում ձոներ հղել ի պատիվ Վիտյայի. 

«Թատըռական հռապառակը չգիտեմ, բայց Ազատության հրապարակը հանրությանն է։
Hayk Marutyan, Viktor Mnatsakanyan, կեցցեք, շնորհակալություն։

Հ.Գ. Հարցեր են մնում, իհարկե, այն մասին, թե համապատասխան տնտեսվարող սուբյեկտները ինչպե՞ս են հաջողացրել ծիծաղելի էժան գներով վարձակալել այդ գերթանկարժեք տարածքները, քանի՞ աշխատող են ունեցել իրականում, ինչպե՞ս են շարունակել աշխատել պայմանագրի լուծումից հետո և այլն։ Հուսամ այս հարցերը չեն վրիպի պատկան մարմինների ուշադրությունից»,-ԱԺ նախագահին ոչ վայել բառապաշարով գրառում է կատարել Միրզոյանը, որին շտապել է լրացնել մեկ այլ իմքայլական՝ գրելով. «Որպես Երևանցի, որպես Կենտրոնի բնակիչ, որպես ՀՀ քաղաքացի, ուզում եմ շորհակալություն հայտնել և ասել, որ հպարտանում եմ իմ ընկեր, իմ բարեկամ, իմ թիմի անդամ Viktor Mnatsakanyan -ով` երեկվա իր պահվածքի, հավասարակշռվածության և պրոֆեսիոնալիզմի համար:
Երևանի քաղաքապետ Hayk Marutyan, քեզ նույնպես շնորհակալություն այս քո համարձակության, վճռականության և սկզբունքայնության համար:
Նաև ուզում եմ հայտարարել, որ պատրաստ եմ ապամոնտաժված սրճարանների երկու աշխատակցի օգնել նույն ոլորտում նոր աշխատանք գտնելու հարցում»:

Ճիշտ է, Վիկտոր Մանցականյանի համար գուցե կենտրոնում ավտոկայանատեղերի վարձավճարները թանկացնելու գաղափարը ավելի ուշ որոշակի խնդիրներ ստեղծի, բայց փույթ չէ, կլինեն իշխանական այլ դհոլչիներ ևս, որոնք իրենց խոնարհումը կհայտնեն Մնացականյանին՝ նրան կարգելով հպարտ քաղաքապետ։

NEWSPRESS.am