Ի՞նչ մեսիջ կա ահաբեկչի զենքի առեղծվածային գրառումների տողատակում

Այսօր անհայտ անձինք հրաձգություն են սկսել Նոր Զելանդայի Քրայսթչըրչ քաղաքի մզկիթներում՝ Ալ Նուր և Լինվուր։

Ըստ ոստիկանության տվյալների՝ 41 մարդ սպանվել է Ալ Նուրի մզկիթում, ևս 7-ը` Լինվուդ մզկիթում:

Սա հերթական ահաբեկչական ակտն է աշխարհում, որը մեզ՝ հայերիս համար ունի խիստ ուշագրավ նշանակություն։

Հարձակվողներից մեկը ցանցում սպանությունների ուղիղ եթեր է հեռարձակել։ Տեսանյութում երևում են զենքի և զինամթերքի վրա տարբեր լեզուներով գրառումներ, այդ թվում` հայերեն, իսպաներեն, անգլերեն, սերբերեն և լեհերեն։

Գրառումների վրա նշված են իրական մարդկանց անուններ և պատմական իրադարձություններ, որոնք ունեն հակաթուրքական հետք։

«Նովոստի–Արմենիա» գործակալությունը փորձել է վերծանել Նոր Զելանդիայում ահաբեկիչների զենքի վրա նշված բոլոր գրությունները։

Սարիղամիշի Ճակատամարտ – Ռուսական կովկասյան բանակի Սարիղամիշի պաշտպանական օպերացիան թուրքական զորքերի դեմ Առաջին համաշխարհային պատերազմի ընթացքում։ Պատմականորեն գտնվել է Մեծ Հայքի Վանանդի գավառի կազմում, իսկ 1877 թվականին ընդգրկվել է Ռուսական կայսրության կազմում։

1914 թվականի դեկտեմբերին հայ կամավորների մասնակցությամբ 3–րդ թուրքական բանակի դեմ ճակատամարտում լիովին ջախջախվեց գեներալ Էնվեր փաշան` Օսմանյան կայսրությունում Հայոց ցեղասպանության գլխավոր կազմակերպիչներից մեկը։

Ի՞նչ է սա նշանակում, ի՞նչ կապ ունեն ահաբեկչական ակտի հետ հայերը, կապ ունե՞ն արդյոք, թե՝ ոչ։ Այս հարցով հրատապ կարգով պետք է զբաղվի Հայաստանի անվտանգության ծառայությունը և Արտաքին գործերի նախարարությունը։ Չի բացառվում, որ սա ահաբեկիչների պատասխանն է մեզ՝ Սիրիա ուղարկված հումանիտար զորախմբի դիմաց, չի բացառվում նաև, որ այս զորախմբով Հայաստանը կամա թե ակամա՝ դարձավ թիրախ իսլամիստ ահաբեկիչների համար։

Արդեն մի քանի ժամ է՝ այս տեսանյութն ու զենքի վրա հայերեն գրությունը հասանելի է համացանցում, սակայն մինչ այս պահը հայկական կողմը կատարվածին որևէ պարզաբանում չի տվել։

NEWSPRESS.am