Օպերայի սրճարաններն արագ «մարսեք», հաջորդն ավտոկայանատեղերն են թանկանալու

Դեռևս մի քանի տարի առաջ Վիկտոր Մնացականյանը որպես Հայկական գորգի ազգային կենտրոնի ղեկավար ձեռնամուխ էր լինում հայկական գորգերի տարածմանը՝ Երևանի կենտրոնում ֆլեշմոբներ կազմակերպելով։ Ֆլեշմոբ էր կազմակերպում, մարդկանց հորդորում ունեցած գորգերը հանել պատուհաններից կախել։ Բավական հետաքրքիր մշակութային ձեռնարկ էր անում, հատկապես տուրիստնական սեզոնին, զբոսաշրջիկների աչքը շոյող։

Երեկ մենք, սակայն, Վիկտոր Մնացականյանին տեսանք լրիվ այլ ամպլուայում։ Նախ, նա այլևս սովորական մարդ չէ, այլ նիկոլական թիմի ներկայացուցիչ՝ Կարգին Հայկոյի հովանու ներքո գործող, Կենտրոնի թաղապետի պաշտոնն զբաղեցնող պետական չինովնիկ, և ապա այլևս ոչ թե մշակութային ձեռնարկ իրականացնող էր, այլ Մեսչյանի հերթական «քմահաճույքն» իրականացնող, ով օլիմպոսյան համբերությամբ, կարմիր բերետավորներով շրջապատված քայլում էր Օպերայի տարածքում և հայտարարում, որ Երևանի տերը նիկոլականներն են, այսինքն՝ իրենք, քանի որ հավաքել են 83 տոկոս քվե և իրենք են ձևել-չափելու իրավունք ունեցողները, որովհետև «բրատ, հասկանո՞ւմ ես, հլը մի հատ ասա 83 տոկոս»։

Դեռ այն ժամանակ, երբ Մնացականյան Վիկտորը գորգերի ֆլեշմոբ էր անցկացնում, շատերը խոսում էին այն մասին, թե կոնկրետ ինչ նյութական շահագրգռվածություն ունի նա այդ ձեռնարկներով, կամ էլ թե ում թիմն է ներկայացնում։ Հայտնի է, որ Վիկտոր Մնացականյանը Սերժ Սարգսյանի փեսա Միքայել Մինասյանի սանիկն է։ Սա հատկապես հետաքրքրական փաստ է, քանի որ Նիկոլի իշխանությունը կարծես թե հենց Սերժ Սարգսյանի ու նրա շրջապատի դեմ էր ուղղված, սակայն հիմա այդ իշխանության առանցքային դեմքերից մեկի հետ կապ ունեցողը փորձում է իրականացնել Նիկոլի նշանակած քաղաքապետի կամ նրա գլխավոր ճարտարապետի քմահաճույքը, կամ էլ պարզապես մասնակցում է վերջիններիս վերժ լուծելու օպերացիային։

Սա, անշուշտ, շատ ինտրիգային է։ Հատկապես, երբ կարմիր բերետավորներն այնպես էին պաշտպանում Միշիկի սանիկին քաղաքացիներից, ասես քաղաքացիները պոտենցիալ ահաբեկիչներ լինեին։ Կարմիր բերետավորները՝ որպես իրավապահներ, կարծես թե, Կենտրոնի թաղապետի թիկնապահները չեն, և սա էլ այլ խնդիր է, որը պետք է լուծում ստանա իրավապահ հակակարգի ղեկավար կազմի կողմից։

Ի դեպ, արդեն հայտնի է դարձել «կինոյի» մյուս սերիայի թեման։ Մնացականյան Վիկտորն արդեն «էս գլխից» հայտարարում է, որ ավտոկայանատեղերը Կենտրոնում թանկանալու են։ Շատ հեշտ է, երբ ոչինչ չես սարքում, բայց հանրային վստահություն ունենալը չարաշահելով՝ քանդում ես ուրիշի սարքածը կամ էլ թանկացնում ես մի բան, որի ստեղծման համար նույնիսկ 100-րդ պլանում մասնակցություն չես ունեցել։

NEWSPRESS.am