«Առաջիններց ենք, որ դուրս եկանք հեղափոխության. էսօր բոլորը ծիծաղում են մեզ վրա». սրճարանի աշխատող

«Էս հեղափոխությունը մենք ենք ուզել, մենք արել, ու առաջինը մեր սրճարանն են քանդել, ու էսօր բոլորը ծիծաղում են մեզ վրա»:

Այս մասին այսօր լրագրողների հետ զրույցում ասաց «Ատլանտիս Գարդեն» ՍՊԸ-ի ներկայացուցիչը՝ Էլիզաբեթ Ղազարյանը: Նա վստահեցրեց, որ իրենք ընդամենը 15 օր առաջ են ծանուցում ստացել, որտեղ նշված էր, թե պետք է ողջամիտ ժամկետում ապամոնտաժեն իրենց սրճարանները:

«Ասենք ինձ համար ողջամիտ ժամկետը մեկ տարին է՝ ինչո՞ւ չէին նշել կոնկրետ ժամկետ, որ մենք պատրաստ լինեին: Լավ, ենթադրենք եկան, զգուշացրեցին, որ արդեն իրենք են ապամոնտաժելու: Մենք ժամանակ ուզեցինք. կանչեցին քաղաքպետարան, ասացին 2 օր ժամանակ ենք տալիս, ու հենց հաջորդ առավոտյան ապամոնտաժումը սկսեցին: Մեզ խաբեցին ու մեր գույքը հիմա փչացնում են. ո՞վ պետք է փոխհատուցի դրա համար»,-ասում է սրճարանի աշխատակցուհին:

Նա նկատում է, որ կոնկրետ իրենց սրճարանում կա շատ թանկարժեկ շատրվան, որը ջարդել են ու ոչ ոք չի մտածում փոխհատուցման մասին: Բացի այդ, նա հերքում է տեղեկությունները, թե իրենց այլ տարածք են առաջարկել:

«Ես հայտարարում եմ «Ատլանտիս Գարդեն» ՍՊԸ-ի անունից՝ մեզ ոչ ոք ոչ մի տարածք չի առաջարկել»,-ասաց  Էլիզաբեթ Ղազարյանը:

Անդրադառնալով քաղաքապետ Հայկ Մարությանի հնչեցրած հայտարարությանը, թե կա գրանցված 20 աշխատող,  «Ատլանտիս Գարդեն» ՍՊԸ-ի ներկայացուցիչը վստահեցնում է, որ իրենք ունենում են սեզոնային աշխատողներ, և գարնանն ու հատկապես ամռանը աշխատողների թիվը ավելանում է: Իսկ այս պահին ունեն 28 աշխատող:

Ամեն դեպքում  Էլիզաբեթ Ղազարյանը նկատում է նաև, որ Հայկ Մարությանի հայտարարությունների մեջ շատ բաներ կան, որոնք իրականությանը չեն համապատասխանում:

«Մենք առաջիններց ենք եղել, որ պայքարել ենք ու հեղափոխությանը մասնակցել են, քանի որ ցանկացել ենք, որ բոլորի համար լավ լինի, ամեն ինչ օրենքով լինի: Մեզ կողքից ասել են, որ մի ուրախացեք, բայց մենք չենք լսել, ու էսօր էդ ասողները եկել ծիծաղում են մեզ վրա: Մենք էլի ենք պայքարելու, դիմելու ենք դատարան, ու կանգնելու ենք էն մյուսների կողքին, ում սրճրանները կցանկանան քանդել»: