Երևանն իրար ինչ-որ հարցեր ապացուցելու վա՞յր է սուպերմայրիկի կամ Ազիզյան հայրիկի համար

Երևանի քաղաքագլուխ, նախկին կարգին տղան եկած-չեկած քանդում է Երևանի սիրտը՝ «ազատագրում է» Օպերայի և բալետի ազգային ակադեմիայի շրջակա տարածքը, ընդ որում՝ ընտրողաբար։ 

Տեղյակ չէ՞ արդյոք Մարության Հայկը, թե Երևանում ծիլ ու ծաղիկ տնկելուց առաջ, ինչքան լուրջ ու անհետաձգելի խնդիրներ կան։ Իհարկե, տեղյակ է։

Հայկի վերածված Հայկոն մինչև ծառ ու թուփ տնկելը, թող զբաղվի Երևանի մահվան «Գազելներով» ու կես ժամը մեկ աշխատող ավտոբուսներով, կարմիր գծերով, կայանատեղիների բացակայությամբ, երբ Երևանում մեքենա կայանելու համար ժամեր են պահանջվում։ Թող զբաղվի գազալցակայաններով, որոնք կառուցելիս չեն պահպանել պատշաճ հեռավորությունը, որոնք տառացիորեն մահվան սպառնալիք են յուրաքանչյուր անցնողի ու առավել ևս բնակելի շենքերի բնակիչների համար։ Թող զբաղվի աղբահանությամբ ու քաղաքը ծխախոտի մնացորդներից ազատելով, թող զբաղվի մահվան վերելակներով, թող զբաղվի անտերության մատնված այգիներով, Աբովյան պուրակի բարեկարգմամբ, մայթեր ստեղծի Երևանի կենտրոնում ու ծայրամասերում, որ հետիոտնը ստիպված չլինի մեքենաներին զիջել կամ ճանապարհ խնդրել՝ վտանգելով կյանքը։ Թող աղբավայրերի հարցը լուծի։ Իսկ քանի՞ աշխատատեղ է բացել քաղաքապետարանը, որ հարյուրավոր մարդկանց թողնում է օրվա հացից կտրվելու սպառնալիքի առաջ։ Ուրեմն ինչո՞ւ է պետք Մարությանին աշխատանքները սկսել հենց այստեղից ու հենց քանդելուց։ 

Ինչպես վարչապետ Փաշինյանն է սիրում կրկնել, օդից կախված լուրերի համաձայն՝ Նիկոլ Փաշինյանը կասկածներ է ունեցել Հայկ Մարությանի և Սերժ Սարգսյանի փեսա, նախկին դեսպան Միքայել Մինասյանի՝ միմյանց հետ կապ ունենալու վերաբերյալ։ Բանն այն է, որ Մինասյանի հետ առնչվող «Արմենիա» հեռուստաընկերությունը վերջերս հաճախ է ցուցադրում Մարությանի մասնակցությամբ ֆիլմերը։ Հենց դա է Փաշինյանին կասկածի հիմք տվել։ Ու հիմա Հայկոն ամեն կերպ ջանք չի խնայում ապացուցելու իրեն քաղաքապետ կարգած Փաշինյանին ապացուցելու, որ ինքը կապ չունի Մինասյանի հետ ու կարող է հանգիստ խղճով քանդել նրա անվան հետ կապվող «Ջազզվե» սրճարանը։ Ի՞նչ է սա, եթե ոչ մանր արկածախնդրություն թե՛ Հայկոյի, թե՛ Փաշինյանի կողմից։ Արդյունքում այս պատմության մեջ «փուռն է գնում» քաղաքի գլխավոր ճարտարապետ Արթուր Մեսչյանը ու անգործ ու անբիզնես մնացող, այդ և հարակից սրճարանների աշխատակիցները։ 

Միլիոնանոց քաղաքն իրար ինչ-որ հարցեր ապացուցելու վա՞յր է սուպերմայրիկի կամ Ազիզյան հայրիկի համար։ Իհարկե, ոչ։ Քաղաքապետ Հայկոն թող լուծի նախ վերը նշված հարցերը, հետո կանցնի թիթեռ նկարելուն։ Կամ էլ վերադառնա կինոաշխարհ ու հագնի իր կանացի կիսաշրջազգեստները․ դրանք ավելի պատիվ բերող են, քան ոստիկանների ծեծուջարդի միջոցով իրականացրած քանդման աշխատանքը։

Արիանա Հովսեփյան

NEWSPRESS.am-ի հիմնադիր-տնօրեն