Ինչու են Վրաստանից ժամանած լուրջ պատվիրակությանը դիմավորում անլուրջ ձևով

Այսօր երկօրյա պաշտոնական այցով Հայաստան է ժամանել Վրաստանի նախագահ Սալոմե Զուրաբիշվիլին:

Նախագահ Զուրաբիշվիլիի գլխավորած պատվիրակության կազմում են Վրաստանի արդարադատության նախարար Թեա Ցուլուկիանին, Վրաստանի խորհրդարանի փոխխոսնակ Գեորգի Վոլսկին, Վրաստանի խորհրդարանի պատգամավորներ, պաշտոնատար այլ անձինք:

Զուրաբիշվիլին Հայաստան է ժամանել բավականին պատկառելի ներկայացուցչական կազմով, և Երևանի «Զվարթնոց» միջազգային օդանավակայանում բարձրաստիճան հյուրին դիմավորել է փոխվարչապետ Տիգրան Ավինյանը։

Հարց առաջանում՝ ինչո՞ւ են Հայաստան ժամանած լուրջ պատվիրակությանը դիմավորում նրանց քաղաքական կշռի հետ համեմատվելու որևէ աղերս չունեցող փոխվարչապետ Տիգրան Ավինյանը, քաղաքապետ Հայկ Մարությանը և ոչ թե Հայաստանի առաջին դեմքը՝ վարչապետ Նիկոլ Փաշինյանը, որին շատ ժամեր պետք չէր Արցախից ուղղաթիռով Հայաստան հասնելու համար։ Հավանաբար, Փաշինյանը հարևան երկրի նախագահին դիմավորելու չի գնացել այն բանի համար, որ նա վերջերս իր սրտացավությունն էր հայտնել Ադրբեջւանի նախագահին ու խոստովանել, որ գիտակցում է՝ ինչ ասել է ապրել օկուպացված տարածքներով։ Փաշինյանն այսկերպ ատամ է ցույց տվել Զուրաբիշվիլիին։

Արդյոք Վրաստանի նախագահն արժանի էր այն ընդունելությանը, կերևա ավելի ուշ՝ հայ-վրացական հարաբերությունների հետագա զարգացման ընթացքում, չի բացառվում, որ նման քայլերով շարունակելու պարագայում Վրաստան մեկնող Նիկոլ Փաշինյանին ու իր թիմին արդեն դիմավորի ինչ-որ վարչության պետ։

Փաշինյանի վերաբերյալ մեկ դիտարկում ևս՝ նա շատ մեծ «լոնքերով» է գնում Սերժ Սարգսյանի հետևից․ եթե իշխանության գալուց հետո իրեն պահում էր որպես ժողովրդի ծոցից դուրս եկած վարչապետ և երևանյան փողոցներով երթևեկելու ժամանակ ճանապարհներ փակել չէր տալիս, ապա վերջին շրջանում հաճախ են փողոցներ փակվում, երբ այդ տարածքով անցնում է Նիկոլ Փաշինյանն ու նրանց սպասարկող մեքենաների շարանը։

NEWSPRESS.am