Գարիկ Սարգսյանն առաջարկում է ԴՆԹ անել․ ցինիզմն անցնում է կարմիր գիծը

Արարատի մարզի Ավշար գյուղում երկու օր է՝ արշալույսները խաղաղ չեն․ դպրոցականները, ուսուցչական անձնակազմը և ընդհանրապես ամբողջ գյուղը դեմ է դպրոցի նորանշանակ տնօրեն Հերմինե Անդրեասյանի նշանակմանը։ Այսօր առավոտից նրանք փակել են միջպետական ճանապարհը և, ինչպես իրենք են անընդհատ կրկնում, մեկ պահանջով՝ տնօրենի հեռացման։ 

Բանն այն է, որ երիտասարդ տնօրենին նշանակել է տվել Արարատի կոկորդիլոսասեր մարզպետ Գարիկ Սարգսյանը՝ ակնկալիքով, որ նաև փոխտնօրենի պաշտոնին է յուրայինի նշանակելու։ Բայց Գարիկի մուրազը փորում է մնացել․ գյուղը կանգնել է ու որոշել է ոչ միայն թույլ չտալ նոր փոխտնօրեն Աստղիկ Հարությունյանի նշանակումը, այլև հեռացնել քնից մի քիչ շուտ արթնացած ու տնօրեն նշանակված Անդրեասյանին։ 

Այսօր առավոտից ճանապարհները բեռնատարներով ու մարդատար մեքենաներով փակ է։ Բայց, պարզվում է, որ դա մարզպետի հեչ պետքն էլ չէ։ Սեփական լեզվի պատճառով քանիցս խայտառակ եղած մարզպետը, ինչպես արդեն լրագրողների շրջանում հայտնի է, հարցազրույց է տալիս բացառապես մեկ լրատվամիջոցի։ Մնացածները «սև» են։

Խնդրի վերաբերյալ պարզաբանում ստանալու ակնկալիքով քիչ առաջ մի խումբ լրագրողներ, այդ թվում՝ NEWSPRESS.am-ի թղթակիցը, այցելել են մարզպետարան, բայց անդրդվելի մարզպետը չի թողել իրեն տեսալուսանկարահանել, բայց ասել է, թե թեև ճանապարհի փակ լինելը հուզում է իրեն, բայց ոչինչ անել չի կարող, կրթության ոլորտի ներկայացուցիչներին դիմեն։ Հա, ի դեպ, նա նաև «ականջներ» է տեսել ակցիայի կազմակերպման հետևում, թե ում ականջները՝ չգիտի, բայց դեռ կիմանա։ Սեփական շուքի՞ց է վախեցել հավանաբար։ Կամ էլ հիշել է մինչ մարզպետ դառնալն իր մասնակցությամբ ուղղորդված ակցիանե՞րը։

Չի գիտակցում կամ էլ հենց լավ գիտակցելով է Սարգսյանը ծաղրուծանակի ենթարկում սեփական մարզի գյուղացիներին՝ մոռանալով, որ հենց նրանց քվեներն էր խնդրում ընտրություններից առաջ, երբ պատգամավորի թեկնածու էր։ 

Իսկ ինչ վերաբերում է հարցին, թե Ավշարի նորանշանակ տնօրենը և/կամ փոխտնօրենն իր ծանոթ-բարեկամուհիներն են, նա ծաղրելով առաջարկել է ԴՆԹ անել։ 

Հիմա հարց ԴՆԹ-ասեր մարզպետին․ հանդիպե՞լ է երբևէ դեպքի, երբ որևէ մեկի արյունը իր մորաքրոջ հարսի արյան հետ համընկել է։ Կոկորդիլոսի ձվի դե՞պքն է վկա։ 

Իսկ եթե ավելի լուրջ, ապա Սարգսյանի պահվածքն, ընդհանուր առմամբ, ընդունելի է, չէ՞ որ ցինիզմը կոնկրետ օրինակներով բնութագրելի է քայլ արածների համար․ ինչ կուզեն կանեն, բա Սերժի և/կամ, տվյալ մարզում, Հովիկի վախտ լա՞վ էր․․․ 

NEWSPRESS.am