Մինսկի խմբի համանախագահների հայտարարությունը բավականին մտահոգիչ է․ Էդմոն Մարուքյան

«Լուսավոր Հայաստան» կուսակցությունը, ինչպես հայտարարել է մինչև ընտրությունները, այսօր էլ իր աջակցությունն է հայտնում իշխանություններին՝ ԼՂ-ը բանակցային սեղան վերադարձնելու հարցում։ Սակայն, ինչպես լրագրողների հետ ճեպազրույցում նկատեց ԱԺ խմբակցության ղեկավար Էդմոն Մարուքյանը, ԵԱՀԿ Մինսկի համանախագահների հայտարարությունը մտահոգիչ է։

«Ամենամտահոգիչ ձևակերպումն այն է, որ ասվում է, որ ԼՂ իրավական կարգավիճակի ապագա որոշակիացումը պետք է լինի իրավաբանորեն պարտադիր կամքի արտահայտման միջոցով:

Սա, ըստ էության, հակասում է հայկական կողմի նախկինում պահված այն սկզբունքային մոտեցմանը, որ Արցախի Հանրապետության քաղաքացիները 91թ. դեկտեմբերի 10-ին հանրաքվեով ինքնորոշվել են, և դա պարտադիր իրավաբանական ուժ ունի: Այսինքն՝ մեր կողմը միշտ սա պնդել է, որ տեղի ունեցած փաստ է, և հիմա կրկին պնդել, որ պետք է հանրաքվե անցկացնել, նշանակում է հաշվի չառնել այդ հանրաքվեն: Կա՛մ պետք է ինչ-որ կերպ նաև այստեղ նշվի՝ այդ հանրաքվեն եղել է, բայց եթե խնդիր կա, որ էլի մասնակիցներ լինեն, խոսքը փախստականների մասին է, ուրեմն պետք է նայեն՝ էն ժամանակ ովքեր են մասնակցել, բայց ընդհանրապես «իգնոր» անել եղելությունը, սա մտահոգիչ է և մեզ համար անընդունելի»,-ասաց նա:

Մարուքյանը նկատում է, որ ՄԽ-ի հայտարարության մեջ մտահոգիչ շատ ձևակերպումներ կան, սակայն դա չի նշանակում, որ իրավիճակը փակուղային է։

«Հայաստանն է Արցախի անվտանգության երաշխավորը, և բոլոր որոշումները Հայաստանի անունից են լինելու, իսկ դա նշանակում է, որ բանակցությունները թեև  կարող են շարունակվել, բայց, մեծ հաշվով, դրանք պտուղ չեն կարող տալ»,-ասաց նա:

Ամեն դեպքում, Մարուքյանի խոսքով, երկրորդ կարծիք չի կարող լինել այն մասին, որ Հայաստանում հող հանձնող չկա։

«Պարզ է, որ Ադրբեջանի կողմից էլ Արցախը ճանաչող չկա, և պետք է շարունակել բանակցել․ ցանկացած բանակցություն կարող է արդյունք տալ»,- ասաց նա:

Հիշեցնենք, որ ԵԱՀԿ Մինսկի խմբի համանախագահները հայտարարություն էին արել ՀՀ վարչապետ Նիկոլ Փաշինյանի և Ադրբեջանի նախագահ Իլհամ Ալիևի առաջիկա հանդիպման վերաբերյալ՝ ողջունելով հանդիպելու պատրաստակամությունը և ընդգծելով, որ հակամարտության ազատ և տևական կարգավորումը պետք է հիմնված լինի Հելսինկիի եզրափակիչ ակտի սկզբունքների վրա, ինչը ներառում է ուժի չկիրառում կամ դրա հետ կապված սպառնալիք, տարածքային ամբողջականություն, ժողովուրդների համար հավասար իրավունքներ և ինքնորոշում: