Մինչ Փաշինյանը զբաղված է գիրք կարդալով, կյանքը թանկանում է

Հանգստյան օրերը, եթե Փաշինյան Նիկոլի ընտանիքում այնքանով էին երջանիկ, որ ընտանիքի պապան տանն էր մնացել և կազմակերպել էր ընտանեկան ընթերցանության լուսանկարման ցերեկույթ, ապա Հայաստանի շատ ընտանիքներում նույնիսկ կիրակին անցավ իր սովորական հունով, այն է՝ օրվա հաց ունենալու պայքարով, հատկապես որ սննդամթերքը բավականին թանկացել է։ Ավելին՝ նույնիսկ Փաշինյանի կողմից այդքան բարձրաձայնված բանանն է թանկացել։

Այսպես, Ազգային վիճակագրական ծառայությունը փաստում է, որ 2019թ. փետրվարին հունվարի համեմատ ՀՀ սպառողական շուկայում արձանագրվել է 0.6% գնաճ: Իսկ ահա Փաշինյանի սիրած բանանի գինը վերջին մեկ ամսում աճել է 10.6 %-ով։ Կարտոֆիլը թանկացել է 6.9 %-ով։ Ընդհանուր առմամբ, սննդամթերքն այս տարվա փետրվար ամսին հունվարի համեմատ թանկացել է 1.7%-ով։ Թանկացումները հատկապես նկատելի են մրգի և բանջարեղենի շուկաներում։ Անցյալ տարվա փետրվարի համեմատ այս տարվա փետրվարին, ըստ վիճակագրական տվյալների, բանջարեղենի գնաճը կազմել է 5,6 տոկոս, մրգինը՝ 11,3 տոկոս։ Ամենակարևոր սննդամթերքը՝ հացը թանկացել է 1,4 տոկոս, այս տարվա փետրվարին, հունվարի համեմատ, իսկ ահա անցյալ տարվա նույն ժամանակահատվածի համեմատ, թանկացումը 2,5 տոկոս է։ Թանկացել է ալյուրն առհասարակ՝ 3,1 տոկոս փետրվարին հունվարի համեմատությամբ և 3,7 տոկոս՝ անցյալ տարվա փետրվարի համեմատությամբ։

Իսկ հիմա եկեք պատկերացնենք, թե այս ամբողջ վիճակագրությունը միջին կազմ ունեցող ընտանիքում՝ ասենք հայր, մայր և երկու երեխա ունեցող, «մաքուրը» 100 հազար դրամ աշխատավարձ ստացող ծնողների դեպքում, երբ համախառն եկամուտը չի գերազանցում 200 հազար դրամը, ինչպես է ազդելու, հաշվի առնելով կոմունալ վճարները, տրանսպորտային և մնացած ծախսերը։ Եզրակացությունը պարզ կլինի չէ՞, որ արվելու են ինչ-ինչ տնտեսումներ, ի հաշիվ առանց այն էլ ոչ լավ կյանքի որակի հաշվին։ Ու այսքանից հետո, իհարկե, մնում է հուսալ, որ Փաշինյանը կսկսի կարդալ այնպիսի գրքեր, որոնք կօգնեն երկրի ամեն մի քաղաքացու կյանքի որակի բարելավմանը։ Այլապես, 285,000 դրամանոց ծաղկեփունջ ստացող Փաշինյանների կյանքի որակը կառավարական դաչայում կարելի է ասել, որ հեքիաթային բարելավում է ունեցել։

NEWSPRESS.am