Այլընտրանքը պատերա՞զմն է. արդո՞ք Փաշինյանը սեղանին կդնի «տարածքներ՝ կարգավիճակի դիմաց» տարբերակը

ԵԱՀԿ Մինսկի համանախագահներն այսօր խիստ ուշագրավ հայտարարություն են արել, որն ավելի շատ ուղղված է հայկական կողմին և, կարես թե, նախազգուշացում է Արցախի հակամարտության կարգավորման ուղղությամբ տարվող բանակցությունների ձևաչափը փոխել ցանկացող Նիկոլ Փաշինյանին:

Թեև Փաշինյանն անընդհատ հայտարարում է, որ Արցախը պետք է վերադառնա բանակցային սեղան, ինքը չի պատրաստվում բանակցել Արցախի փոխարեն, բայց Մինսկի խմբի համանախագահները կարճ, կոնկրետ հասկացրել են, որ դա հնարավոր չէ:

Համանախագահները, մասնավորապես, կողմերին կոչ են արել ձեռնպահ մնալ հայտարարություններից և գործողություններից, որոնք առաջարկում են էապես փոխել իրավիճակը տեղում, նախապայմաններ են սահմանում ապագա բանակցությունների համար, պահանջում են ձևաչափի միակողմանի փոփոխություն՝ առանց մյուս կողմի համաձայնության, ռազմական գործողությունները վերսկսելու պատրաստակամություն են պարունակում:

Սա նշանակում է, որ Փաշինյանին բաց տեքստով հասկացնում են, որ նրա հայտարարությունները չեն ընկալվել համանախագահների կողմից, ավելին՝ դրանք անգամ քննարկումների ենթակա չեն:

Ի՞նչ է ստացվում:

Եթե Փաշինյանը չի ցանկանում բանակցել Արցախի անունից, քանի որ իրեն արցախցիները չեն ընտրել, Արցախի՝ բանակցությունների սեղանին վերադարձնելն այս պահին անիրատեսական է, ինչի մասին փաստում է համանախագահների այս հայտարարությունը:

Ստացվում է՝ Արցախն Արդեբեջանի հետ դեմ հանդիման մնում է միայնակ:
Կկարողանա՞ արդյոք Փաշինյանն այս կոլապսից դուրս գալ, հանդիպել ու Ալիևի հետ լեզու գտնել՝ կերևա ավելի ուշ, իսկ մինչ այդ արդեն իսկ փորաձագիտական շրջանակները կասկածի տակ են դնում, որ Փաշինյան-Ալիև հանդիպումն առհասարակ հնարավոր է:

Իսկ դա կնշանակի, որ Արցախի հարցի բանակցությունները մտել են փակուղի. բանակցություների դադարի կամ կասեցման այլընտրանքը պատերազմն է:

Հետաքրքրական է նաև Մինսկի խմբի համանախագահների մեկ այլ շեշտադրում ևս՝
«Հարցի կարգավորումը պետք է նաև ներառի լրացուցիչ տարրեր, որոնք 2009-2012 թվականներին առաջարկվել են համանախագահ երկրների ղեկավարների կողմից, ներառյալ՝ Լեռնային Ղարաբաղը շրջապատող տարածքների վերադարձը Ադրբեջանի վերահսկողության ներքո, Լեռնային Ղարաբաղի ժամանակավոր կարգավիճակը՝

Անվտանգության և ինքնակառավարման երաշխիքներով, Հայաստանը Լեռնային Ղարաբաղի հետ կապող միջանցքը, Լեռնային Ղարաբաղի վերջնական իրավական կարգավիճակի ապագա սահմանումը՝ իրավական ուժ ունեցող կամարտահայտության միջոցով, բոլոր տեղահանված անձանց և փախստականների վերադարձի իրավունքը իրենց բնակության նախկին վայրեր, անվտանգության միջազգային երաշխիքները, որոնք ներառելու են խաղաղապահ գործողություն»:

Նման ձևակերպումը հերթական անգամ փաստում է տարածքների վերադարձ՝ կարգավիճակի դիմաց թեզը, ինչը չի բացառել Փաշինյանը:

ՀՀ վարչապետը հայտարարել է, որ «չի քննարկվել տարածքներ խաղաղության դիմաց» տարբերակը, իսկ ահա «տարածքներ՝ կարգավիճակի դիմաց» տարբերակի մասին իշխանությունները լռում են:

Որևէ հերքում այս մասին մինչ օրս մեզ հայտնի չէ:

NEWSPRESS,am