Աննա, կրճատված ու արտագաղթի ճանապարհը բռնած տղամարդկանց կանայք էլ են ցանկանում շփվել իրենց ամուսինների հետ․ ամոթ է

Աննա Հակոբյանը երեկ Հանրային հեռուստաընկերության եթերում պատասխանեց արդեն օրեր շարունակ իր հասցեին հնչող քննադատություններին։ Աննան դրանց մասին խոսեց շատ երկար, Հանրայինի եթերում ասաց բաներ, որոնք հարիր չեն երկրի վարչապետի տիկնոջ կարգավիճակում գտնվողին։ Հավանաբար Աննան որոշել էր ամենափոքր մանրուքն անգամ պատմել Հանրայինի եթերից՝ հույս ունենալով, որ այդպես քննադատությունների տարափը կհանդարտվի։ Սակայն ստացվեց այնպես, ինչպես միշտ․ քննադատություններն ավելի խիստ դարձան։

Աննան ասում է, որ ամուսնու հետ մեկնել է Բրյուսել, ամենևին էլ դա թաքուն չի արել, նրա հետ բարձրացել է ինքնաթիռ և իջել, բոլոր նրանք, ովքեր ուղեկցում էին ամուսնուն, տեսել են իրեն, իսկ թե ինչու նախապես չի հայտարարվել իր այցի մասին, Աննա Հակոբյանը շատ կարճ պատասխանում է․ ես պաշտոնական պատվիրակության կազմում չեմ եղել։

«Մեկնել եմ, որովհետև նման այցերը միակ հնարավորությունն են, որ մենք շփվենք միմյանց հետ»,- հպարտությամբ Հանրայինի եթերում ասաց Աննան, ինչը նրան լսողներն ընկալեցին այսպես․ «Մարդն առանց ամուսնու չի կարողանում, հո մեղք չի գործում»։ Այո՛, մեղք չի գործում, բայց սխալ է անում, երբ եթերում խոսում է ամուսնուն խանդելու, անկողնում նրա կողքը դատարկ չթողնելու մասին.․․ հարիր չէ առաջին տիկնոջ շուրթերից այս մակարդակի զրույց լսել։

Այո՛, մեղք չի գործում Աննան, բայց սխալ է անում, երբ իր քայլերի և արարքների համար որպես պատճառ բերում է ամուսնու հանդեպ տածած խոր զգացմունքները։ Ի՞նչ է, նախորդների կանայք քա՞ր էին, որ դիմանում էին։

Այն, որ Աննա Հակոբյանն իր կարգավիճակի զգացողությունը չունի, մշտապես ասվել է․ այդ զգացողության բացակայությունը չի լրացնում ոչ նրա իմիջի ձևավորումը, ոչ թանկարժեք հագուկապը ոչ էլ որևէ բան։

Այդ դատարկությունն այս տիկնոջ ներսում է, որը չես կարող լցնել ոչ մի բանով։

Իսկ նախքան առանց ամուսնու չկարողանալու մասին իր զգացողությունները հրապարակելը, տիկինը ճիշտ կաներ հիշեր, թե Փաշինյանի իշխանության շրջանում օպտիմալացման արդյունքում գործազուրկ դարձած ու արտագաղթի ճանապարհը բռնած քանի-քանի հայուհիներ են ցանկանում շփվել իրենց ամուսինների հետ, ինչի հնարավորությունը, սակայն չունեն։ Ամոթ է, Աննայի երեկվա հարցազրույցը լսելուց հետո այլ բան ասել չի լինում։

NEWSPRESS.am