Կովի պտուկները ջրով լվացեք, տաքսիստներին թրաշեք, չստիկները փոխեք. մեր վարչապետները լուրջ հարցեր չունե՞ն

Մեր երկրի գլխավոր խնդիրներից մեկն այն է, որ դրանցով զբաղվող ամենաբարձր օղակներում նստած մարդիկ ֆիքսվում են սոցիալական խնդիրների վերջնական տեսքի վրա և չեն խորանում դրանց պատճառների մեջ:

Մեր գրեթե բոլոր վարչապետները սկսում են մանրուքների անդրադառնալ, մշտապես մեկնաբանել տարբեր ինտրիգային թեմաներ, տարբեր անիմաստ ծրագրերով փողեր մսխել և մոռանալ, որ կործանվող տնտեսության մենեջմենթով պետք է զբաղվեն:

Այդպես էր նախկինում, այդպես է նաև հիմա:

Երևի ոչ ոք չի մոռացել նախկին վարչապետ Տիգրան Սարգսյանի՝ գյուղացիների համար կով կթելու մասին դասախոսությունները. «Սկզբում պտուկները գոլ ջրով լվանալ, հետո մաքուր սրբիչով սրբել... և այլն», կամ Ռուսաստանից հրավիրված Կարեն Կարապետյանի՝ օդանավակայանի տաքսիստների վերաբերյալ ելույթը. «Անթրաշ, չստիկով, սիգարետը բերանին, Երեւանյան լիճը Սեւանա լճի տեղ Մալաթիա Սեբաստիայով բերել, տարիֆների տարբեր կիրառում եւ այլն»:

Հիմա էլ հեղափոխական Նիկոլ Փաշինյանն է նույն այդ խնդրին անդրադառնում. «տնական շորերով, «չստերով» տաքսիստներին» մեր զբոսաշրջության մեծագույն պրոբլեմը համարելով:

Իհարկե, վարչապետների կարծիքների մեջ ինչպես նմանություններ, այնպես էլ հակասություններ կան, զորօրինակ՝ Նիկոլ Փաշինյանն, ի տարբերություն Տիգրան Սարգսյանի՝ Արարատի մարզ իր այցելություններից մեկի ժամանակ ասում էր, որ պետք չէ գյուղացուն կով կթել սովորեցնել:

Մի խոսքով՝ այսպես դատարկաբանելով, պահին հարմար, դեկլարատիվ ելույթներ ունենալով էլ ղեկավարում են մեզ ու այդպես էլ դոփում նույն տեղում. հիմա կով կթելու դասեր տա՞նք գյուղացուն, թե՝ ոչ, իսկ միգուցե կո՞վ տանք գյուղացուն, կամ տաքսիստի չստերից բողոքելուց առաջ տաքսիստին ավել գումար աշխատելու հնարավորությո՞ւն տանք, որ մի բան էլ տրամադրի արտաքին տեսքին, թե՞ թողնենք այդպես՝ առավոտից երեկո դրսում կարկանդակ ուտի, ապրի երկու կոպեկ իրար կպցնել-տուն տանելու հույսով, վարչապետների համար էլ կառավարության նիստը քննարկվող դարձնի:

Կարելի է հարցնել՝ հիմա տաքսիստնե՞րն են մեղավոր, որ Հայաստանում զբոսաշրջությունը չի զարգանում, թե՞ օրինակ, Զբոսաշրջության պետական կոմիտեն, որը, չգիտենք՝ երբ է վերջին անգամ Հայաստանի մասին գովազդող հետաքրքիր հոլովակ նկարել և տրամադրել լայն սփռման հեռուստաընկերություններին:

Խնդիրներն իրականում շատ են և արմատական: Խնդիր է, որ թույլ ենք տալիս՝ մեր վարչապետները ամբիոններից մեզ ծաղրեն ու մեր ուշադրությունը հրավիրեն չնչին, մեկ օրում լուծվող խնդիրների վրա, իսկ խորքային հարցերը թողնեն խորքերում:

Քանի՞ կառավարություն պետք է փոխվի, որ ի վերջո լուծվի գյուղացուն կով կթել սովորեցնելու կամ չսովորեցնելու և տաքսիստներին որոշակի տեսքի բերելու հարցերը:

NEWSPRESS.am