250-ից ավելի վարորդների բողոքի ակցիան «թյուրըմբռնում էր»․ «Երևան ավտոբուս» ՓԲԸ տնօրեն

Հեղափոխությունը պետք է սկսենք մեր մեջ, չենք կարող ասել՝ հնարավոր չէ և թողնել ամեն ինչ։ Այդ մասին մամուլի ասուլիսի ժամանակ ասաց Երևանի քաղաքապետի առաջին տեղակալ Հրաչյա Սարգսյանը՝ անդրադառնալով «Երևան ավտոբուս» ՓԲԸ 250-ից ավելի վարորդների բողոքի ակցիային։

Փոխքաղաքապետի համար անհասկանալի է, թե ինչու վարորդները համաձայն չեն այդ վերահսկողությանը, եթե թաքցնելու բան չունեն։

Ավտոբուսներում տեսախցիկները 5 օր առաջ են տեղադրվել։ Հրաչյա Սարգսյանն ասում է, որ դա արվում է ուղևորների անվտանգության համար, սակայն այս օրերին դեռևս ոչ մի վտանգավոր բան չեն արձանագրել։

Ամեն դեպքում, նրա կարծիքով, բողոքի ակցիան կազմակերպված է։

«Տեսախցիկները դրվել են, որ հսկվի վարորդների վարքը՝ ծխում են-չեն ծխում, ինչպես են դրսևորում իրենց»,- ասաց փոխքաղաքապետը՝ հավելելով նաև, որ վարարդները պետք է սափրված լինեն։

Արձագանքելով դիտարկմանը, որ տեսախցիկներից մեկը վարորդները հանել են, փոխքաղաքապետն ասաց, որ մեքենաներից տեսախցիկները հանելու հետ կապված քաղաքապետարանի կողմից հանձնարարական չի եղել. «Եթե որևէ վարորդ տեսախցիկը հանել է ավտոբուսից, ապա այն պետք է անպայման վերադարձնել իրենց տեղը»:

Նա նաև փարատեց այն մտահոգությունը, թե վարորդները գումարային կորուստ կարող են ունենալ։

Ըստ էության, սա ծրագրի առաջին փուլն է, իսկ երկրորդ փուլում արդեն կտեղադրվեն տեսախցիկներ, որոնք կվերահսկեն ուղևորներին։

«Սա արվում է քաղաքացիների անվտանգությունն ապահովելու համար։ Մենք չենք ցանկանում մեր ասածը դեկլարատիվ լինի, թե Ֆեյսբուքում քանի լայք, քանի սրտիկ ենք հավաքելու, ուզում ենք մեր արածը տեսանելի լինի»,- ասաց նա։

«Երևան ավտոբուս» ՓԲԸ տնօրեն Էլբակ Թարփոշյանն էլ վստահեցրեց, որ վարորդները սխալ են հասկացել կատարվածը և հավատացրեց, որ ավտոբուսները կաշխատեն անխափան։ Նրա խոսքով՝ բողոքի ակցիան թյուրըմբռնման արդյունք էր։