Ով դժգոհ է, թող դիմում գրի, աշխատանքից դուրս գա․ փոխքաղաքապետը՝ ավտոբուսներում տեսախցիկ տեղադրելու մասին

Երևանի քաղաքապետի առաջին տեղակալ Հրաչյա Սարգսյանը հերքում է տեղեկությունը, թե ավտոբուսներում տեղադրվելիք տեսագրող սարքերը նաև ձայնագրում են։ Նա այդ մասին հայատարարեց մամուլի ասուլիսի ժամանակ։ 

Փոխքաղաքապետի խոսքով՝ տեսախցիկների միջոցով կարող են հետևել վարորդի վարքագծին և ապահովել ուղևորների անվտանգությունը։

Պիլոտային ծրագրի շրջանակում նախնական 2 տեսախցիկ տեղադրվել է 2 ավտոբուսի վրա, որից հետո տեսախցիկներ կտեղադրվեն նաև մյուս ավտոբուսների վրա։

Հրաչյա Սարգսյանը նկատեց, որ տեղյակ է վարորդների դժգոհությունների մասին, սակայն կարծում է, որ փոփոխություններն անհրաժեշտ են։

«Մենք պետք է փոփոխություններ անենք, որ մեր Երևան Ավտոբուսը մինուսով չաշխատի։ Պետք է ՓԲԸ-ները լինեն շահութաբեր, և այդ փոփոխությունը մենք սկսել ենք Երևան ավտոբուս ՓԲԸ-ից»,-ասաց քաղաքապետի տեղակալը։

Նա համաձայն է, որ տրանսպորտը լավ չի աշխատում և բարելավման ուղին այդկերպ է պատկերացնում։ Հրաչյա Սարգսյանի խոսքով՝ եթե ուզում ենք տրանսպորտը լավ աշխատի, ապա քաղաքապետարանի այս տեսլականի հետ պետք է հարմարվել։

«Մենք ջայլամի քաղաքականություն չենք իրականացնում ու խոստովանում ենք, որ տրանսպորտը լավ չի աշխատում, ու այն, որ ամեն ինչ պետք է կանոնակարգվի՝ փաստ է, իսկ նրանք, ովքեր բողոքում են, կամ համաձայն չեն մեր առաջարկած պայմաններին, խնդրեմ՝ կարող են դիմում գրել և աշխատանքից դուրս գալ։ Մարդիկ ասում են՝ ինչո՞ւ պետք է ինձ վերահսկեն, ասեմ՝ վերահսկողության համակարգ կա բանկային համակերգերում ու բոլոր երկրներում»,-ասաց Հրաչյա Սարգսյանը։

Նա նկատեց նաև, որ դեռ 10 տարի առաջ կարող էին ազատված լինել դիսպեչերներից, ովքեր կնոպկա են սեղմում ու ժամ պահում։