«Մի կաթիլ մեղրը». դանակահարություն ավտոմեքենայով իրար չզիջելու պատճառով. Shamshyan.com

Մարտի 3-ին՝ ժամը 22։20-ի սահմաններոմ Աբովյանի բժշկական կենտրոնից ոստիկանության Աբովյանի բաժին ահազանգ է ստացվել, որ «որովայնի ձախ կեսի կտրած-ծակած թափանցող վերք՝ ճարպոնի արտանկումով» ախտորոշմամբ իրենց մոտ է տեղափոխվել մի քաղաքացի։ Այդ մասին հայտնում է Shamshyan.com-ը: 

Հիվանդանոց են մեկնել ոստիկանության Կոտայքի բաժնի օպերատիվ խումբը՝ բաժնի պետ Ա. Ղազարյանի գլխավորությամբ։ Ոստիկանները պարզել են, որ վիրավորը Աբովյան քաղաքի 4-րդ միկրոշրջանի բնակիչ՝ 27-ամյա Սարգիս Սուքիասյանն է։

Բժիշկները ոստիկաններին և քննիչներին հայտնել են, որ վիրավորն ի վիճակի չէ կատարվածի մասին բացատրություներ տալու, ու մինչ բժիշկները պայքարում էին վիրավորի կյանքիհամար, ինչը նրանց հաջողվել է, ոստիկանները պարզել են, որ նույն օրը, ժամը 22։00-ի սահմաններում Զառ գյուղի Հաղթանակի փողոցում վիճաբանություն է տեղի ունեցել վիրավոր Ս. Սուքիասյանի և Ա. Խաչատրյանի միջև, որի ժամանակ էլ վերջինս իր մոտ եղած դանակով հարվածել է Ս. Սուքիասյանին։

Մինչ քննիչները դեպքի վայրի զննություն էին կատարում, ժամը 01։00-ի սահմաններում Աբովյանի բժշկական կենտրոնից հերթական ահազանգն է ստացվում ոստիկանության Աբովյանի բաժին, որ ««որովայնի բութ տրավմա, բազկի փափուկ հյուսվածքների սալջարդ, գլխուղեղի ցնցում հարցականով» ախտորոշմամբ բուժօգնության է դիմել Զառ գյուղի բնակիչ՝ 41-ամյա Նելի Ավետիսյանը և «որովայնի բութ տրավմա, ձախ դաստակի և աջ ազդրի փափուկ հյուսվածքների սալջարդ» ախտորոշմամբ՝ Զառ գյուղի բնակիչ՝ 45-ամյա Մարինե Վարդանյանը։ Հիվանդանոց մեկնած ոստիկաններին և քննիչներին վերջիններս հայտնել են, որ Զառ գյուղի Հաղթանակ փողոցում իրենք ծեծի են ենթարկվել։

Կարճ ժամանակում Աբովյանի ոստիկաններն ու քննիչները պարզել են, որ վերջիններս մարմնական վնասվածքները ստացել են Ս. Սուքիասյանի և Ա. Խաչատրյանի միջև տեղի ունեցած «Մի կաթիլ մեղր»-ի պատմություն հիշեցնող վիճաբանության ժամանակ։

Կայքի տեղեկություններով՝ վիճաբանության պատճառը եղել է ավտոմեքենայով իրար չզիջելը, իսկ Մ. Վարդանյանն ու Ն. Ավետիսյանը Ա. Խաչատրյանի ազգականներն են։ Ա. Խաչատրյանը քննիչներին է ներկայացրել նաև հանցագործության գործիք հանդիսացող դանակը։ 

Ա. Խաչատրյանի նկատմամբ որպես խափանման միջոց է ընտրվել ստորագրություն՝ չհեռանալը, քանի որ հաշվի է առնվել այն հանգամանքը, որ ունի մշտական բնակության վայր, խնամքին էլ ունի 12 անձ:

Մանրամասները՝ սկզբնաղբյուր կայքում