«Եթե ասում ենք` անարդարություն չի նշանակում` անարդարություն, նշանակում է` արդարության բացակայություն». Հրանտ Բագրատյան

«Բարգավաճ Հայաստան» խմբակցության պատգամավոր Սերգեյ Բագրատյանն Ազգային արտահերթ ընտրությունների որակի մասին կասկածներ չունի, սակայն նա այլ խնդիր է տեսնում: Այդ մասին պատգամավորը հայտարարեց այսօր՝ մարտի 6-ի ԱԺ նիստի ժամանակ:

Նրա գնահատմամբ՝ ընտրություններն ամենաբարձր մակարդակով անցան, սակայն քաղաքացիների հետ աշխատանք կա տանելու: Բագրատյանն ընդգծեց, որ նկատի ունի ոչ թե ակտիվ, այլ քաղաքացիների վրա ներգործող պասիվ ազդեցությունը և փորձեց բացատրել, թե ինչ է նշանակում դա:

«Դա նշանակում է, որ դու քաղաքացուն ոչ մի բան չես ասում, կամ, օրինակ, մարզպետը գյուղապետին չի ուղղորդում, սակայն գյուղապետն իր մեջ որոշում է՝ եթե մարզպետը այսինչ կուսակցությունից է՝ ես պետք է քվեարկեմ այդ կուսակցության թեկնածուի օգտին»,- ասաց Բագրատյանը և հավելեց, որ խոսքը քաղաքացիների մասին է, ում հարկավոր է քաղաքական իմաստով պետք է ճիշտ դաստիարակել:

Ավելի պարզեցնելու և թյուր կարծիք չստեղծելու համար՝ Բագրատյանը փորձեց այլ կերպ բացատրել:

«Իմ ասածը հետևյալն է. եթե մենք ասում ենք՝ մութ է, չի նշանակում մութ է, նշանակում է լույսի բացակայություն, եթե ասում ենք՝ ցուրտ է, չի նշանակում, որ ցուրտ է, նշանակում է արևի բացակայություն, եթե ասում ենք անարդարություն, չի նշանակում, որ անարդարություն է, նշանակում է արդարության բացակայություն»,-ասաց պատգամավորը:

Նրա դիտարկմամբ՝ Հայաստանում արդարության հարցը լուծված է, բայց այն ամրապնդելու խնդիր կա: Այդ իսկ պատճառով էլ պատգամավորն առաջարկում է թերություններ տեսնելիս անպայման բարձրաձայնել դրա մասին ու հանդես գալ առաջարկներով:

«Խնդրում եմ՝ բառերը ճիշտ լսել, չխեղաթյուրել և անհարկի չշահարկել»,-եզրափակեց Բագրատյանը:

Հիշեցնենք, որ երեկ՝ մարտի 5-ին Ազգային ժողովում քննարկվում էր «Հայաստանի Հանրապետության Ազգային ժողովի 2018 թվականի դեկտեմբերի 9-ի արտահերթ ընտրությունների մասին» կենտրոնական ընտրական հանձնաժողովի գործունեության վերաբերյալ հաղորդումը: