Փոխարենը ներողության՝ ձեռք է առնում. Աննա Հակոբյանն ու դուստրը բյուջեն մսխում են Բելգիայում

Մեր հրապարակումներում բազմիցս ենք անդրադարձել վարչապետ Նիկոլ Փաշինյանի տիկնոջ՝ Աննա Հակոբյանի դրսևորած վարքին: Կարող է անգամ տպավորություն ստեղծվել, որ կենտրոնացել ենք նրա անձի վրա, բայց, քավ լիցի, մաքուր սրտով և շտկվելու ցանկություն ստեղծելու միտումով ենք անդրադառնում նրան: Ցանկությունը մեկն է՝ Աննան, կարդալով իր հասցեին քննադատական հրապարակումները, հասկանա, որ իր աչքածակության պատճառով իր ամուսնու հեղինակության վրա է ազդում:

Այսպես. տարիներ շարունակ թերթի խմբագիր կինը միշտ էլ ունեցել է հրապարակային կյանք, որն ուսումնասիրելով՝ հասկանում ենք, որ այս ընտանիքն աչքի չի ընկել տարատեսակ ուղևորություններով, սակայն հիմա, երբ ասում ենք՝ իրավիճակ է փոխվել, պետք է նկատի ունենանք, որ առավելագույնս իրավիճակ է փոխվել Աննա Հակոբյանի «վոյաժների» հարցում:

«Պատահական զուգադիպությամբ» այս կնոջ ուղևորությունները համընկնում են ամուսնու պաշտոնական այցերի հետ, հիմա էլ նույն «պատահականությամբ» նրա դստեր՝ Մարիամ Փաշինյանի ուղևորություններն են համընկնում հոր այցերի հետ:

Հանրությունը, լրագրողները քննադատում են նման մոտեցումը, քանի որ մշտապես իրենց ընդդիմադիր լինելու տարիներին հնարավոր բոլոր ձևերով՝ թերթի էջերից և ԱԺ-ից լուտանքներ են թափել նմանատիպ վարք դրսևորող պաշտոնյաների հասցեին և այսօր այդպես դաստիարակված հանրությունը չի հարմարվում այլևս:

Աննան մի բան էլ սրտնեղում է, թե ինչու են լրատվամիջոցները գրում այն մասին, որ իրենք, ընտանյոք հանդերձ, գնացել են հանգստի՝ բյուջեի հաշվին: Իհարկե, շատ չի ուշացել Աննայի ֆեյսբուքյան հուզառատ և ժողովրդին ձեռք առնող գրառումը, սակայն պետք է նկատել, որ այս կնոջ վարքագիծն արդեն անընդունելի է, քանի որ ոչ միայն ինքը Բելգիայից պաշտոնապես հրավեր չի ունեցել, աղջիկն՝ առավել ևս, մի բան էլ թաքցնում են իրենց այցը:

Փոխարենը ներողության կամ մանրամասն պարզաբանման՝ Աննա Հակոբյանը պարզապես սարկաստիկ տեքստ է հեղինակել, թե՝ ոչ ոք չի խոսում իր թռիչքների մասին միայն երկու կայք են քննադատում իրեն, թե՝ ինչո՞ւ է Բելգիայում թրև գալիս:

Ո՞րն է Ձեր առաքելությունն այդ երկրում: Մշտապես ասում եք, թե օտարերկրյա հանդիպումներն արդյունքներ են տալիս, մենք այդպես էլ մի արդյունք չտեսանք, որ շնորհիվ ձեզ ի բարօրություն մեր պետության լիներ: 

Ձեր ղեկավարած հիմնադրամներն էլ միայն լցված են տեղի բիզնեսմենների փողերով, լավ չի՞ լինի արդյոք նստել տանը, բելգիաներում փող չծախսել, միևնույն է, եղած փողը տեղի բիզնեսից է:

Անարդարությունն այդպես էլ շարունակում է տիրել մեր երկրին և հիմքն է մեծ ցասման:

NEWSPRESS.am