Ոստիկանության անգործությո՞ւն, թե՞ ամենաթողություն. ինչպես են Նարեկ Մալյանին փորձում աղբաման նետել (տեսանյութ)

Չնայած նրան, որ արդեն համացանցում շրջում է տեսանյութը, թե ինչպես են «Ռեստարտ» նախաձեռնության անդամները բռնել Նարեկ Մալյանի ոտքերից ու ձեռքերից և ինչպես են նրան փորձում գցել աղբամանը, այնուամենայնիվ իրենք՝ տղաները, իրենց մեղավոր չեն համարում:

Նրանք հայտարարել են, թե. «Ո՛չ ծեծել ենք, ո՛չ վիրավորել ենք, ո՛չ առևանգել ենք և առհասարակ մատով չենք կպել Նարեկ Մալյանին»:

Դե եթե տղաները կարծում են, որ մարդուն աղբաման նետելը բռնություն չէ, առևանգում չէ և նորմալ են վերաբերվում դրան, ապա կարելի է մտածել, որ նրանք աղբամաններում են բնակվում, իսկ աղբաման մտնել-դուրս գալը նրանց համար սովորական, ամենօրյա երևույթ է։

Այս «ուժեղ ու խելոք» տղաները ասել են նաև, որ «Եթե ցանկանայինք ծեծել, Նարեկն առնվազն հաշմանդամ կլիներ»:

Սա արդեն թերևս խոսում է ծայրահեղ լկտիության ու ամենաթողության մասին: Այսինքն՝ այս երիտասարդ կոչվածներին ինչ-որ մարդիկ թևեր են տվել այն աստիճան, որ նրանք հեգնանքով են խոսում կատարվածի մասին: Իրականում նրանց արարքը դատապարտելի է, և նրանք պետք է ենթարկվեն նաև քրեական պատասխանատվության, քանի որ որքան էլ իրենք իրենց համոզեն, այնուամենայիվ, փաստն այն է, որ այդ երիտասարդները Նարեկ Մալյանի կամքին հակառակ արարքներ են արել, առևանգել են նրան, զրկել պաշտպանվելու հնարավորությունից և դիմել խուլիգանական գործողությունների:

Բայց ոստիկանությունը կարծես անհաղորդ է կատարվածին: Հետաքրքիր է՝ է՞լ ինչ էին ակնկալում նրանք տեսնել փողոցներում, որպեսզի ի վերջո արձագանքեն:

Այսինքն՝ մարդուն մի քանի խուլիգաններ կարող են բռնել, նրա կամքին հակառակ տեղաշարժել նրան և մնալ անպատիժ:

Կեցցե մեր ոստիկանությունը, ամենամարդասեր ոստիկանությունը, որը, չգիտես ինչու, չի ցանկանում նեղացնել «խեղճ ու կրակ» երիտասարդներին: Ու գրողի ծոցը, թե նրանց խուլիգանական գործողություններից քաղաքացի չի տուժել:

Իհարկե, նման բան կարելի էր ակնկալել ոստիկաններից հատկապես այն բանից հետո, երբ հոմոսեքսուալները մտան բաժանմունք, ծեծ ու ջարդ սարքեցին այնտեղ և մնացին անպատիժ․․․ սա իմիջայլոց․․․

Տղաներն ասել են նաև, թե ամենևին էլ միտված չեն եղել Մալյանի ազատ խոսքին բռնանալու, սակայն գուցե ավելի լավ կլիներ, եթե նրանք ասեին, որ իրենց դուր չի եկել Մալյանի այս կամ այն խոսքը և որոշել են վրեժխնդիր լինել ու ոչ թե ցինիկի նման հայտարարել, թե ուղղակի ցանկացել են ինչ-որ բան ցույց տալ ինչ-որ մեկին...

«Ակցիան ուներ հստակ մեսիջներ ու այդ մեսիջներն անհրաժեշտ էր տեղ հասցնել»,-ասել են տղաները, ու չի քննարկվում, թե այդ ակցիայի մեսիջը որն էր. ա՞յն, որ ամեն ջահել-ջուհուլ քաղաքի փողոցներում ում ուզի՝ կգցի աղբամա՞ն, թե՞ այն պարզապես սպառնալիք էր ուղղված բոլոր նրանց, ովքեր կհամարձակվեն բերան բացել ու ասել, թե Սորոսը, իր սորոսականներով, Հայաստանը քանդում է:

Ամեն դեպքում սա արատավոր երևույթ է ու կարող է նախադեպ դառնալ ամեն թափթփուկի համար՝ խմբով հարձակվելու, քաշքշելու և աղբաման նետելու նրան, ով իրեն դուր չի գալիս, կամ նեղացրել է, կամ էլ նա այդ կերպ պարզապես ցանկանա ինչ-որ մեկին, ինչ-որ բան ցույց տալ կամ ապացուցել...

Իսկ ինչո՞ւ պետք է չանի, եթե միևնույնն է, դրա համար նա պատասխանատվության չի ենթարկվելու և պատիժ չի կրելու...

Այս ո՞ւր ենք հասել․․․

Արմինե Մկրտումյան