Ինչու Տեր-Պետրոսյանի ատամն անակնկալ ցավեց

Երեկ՝ մարտի 1-ի 11-րդ տարելիցի օրը, տեղի ունեցած միջոցառումներին ՀՀ առաջին նախագահ Լևոն Տեր-Պետրոսյանն այդպես էլ չմասնակցեց։ Նրա խոսնակը միայն հայտարարել էր, որ Տեր-Պետրոսյանը ենթարկվել է ատամնաշարային վիրահատության ու դրա պատճառով չի մասնակցի միջոցառումներին։ Նախորդ տարիներին, կարծես թե քիչ են եղել դեպքերը, երբ Տեր-Պետրոսյանն այս օրվա խորհուրդը և դրա հետ կապված միջոցառումը, գոնե ծաղիկների խոնարհումը, բաց է թողել։ Բավական մեծ տարիքի հասած առաջին նախագահի այս քայլն ուշադրություն չէր գրավի, եթե մինչ այդ նա ծավալուն հոդվածով իրեն չզատեր Նիկոլ Փաշինյանից։ Իսկ միջոցառումների մասնակցությունը, ինչպես հասկանալի է, պետք է լիներ Փաշինյանի հետ ձեռք ձեռքի կամ գոնե կողք կողքի։

Այս դրվագի կողքին, արդեն Տեր-Պետրոսյանի երեկվա հրաժարվելն ակամա այն տպավորությունը ստեղծեց, որ, իրոք, նա ցանկանում է ամեն կերպ իրեն հեռու պահել գործող իշխանություններից։ Մենք արդեն գրել էինք, որ սա կարող է լինել կա′մ մանևր, կա′մ նախազգուշական ինչ-որ քայլ, կա′մ էլ կարող է ունենալ այլ պատճառ։

Ինչպես հայտնի է, Փաշինյանը մարտի 1-ի երթի մասին հայտարարել էր մարտի մեկից դեռ մոտ մեկ շաբաթ առաջ։ Դեռ այն ժամանակ մամուլում զարմանք հայտնվեց, թե ինչու է շտապում Փաշինյանը և նույնիսկ կարծիք շրջանառվեց, որ ցանկանում է նույնիսկ մարտի 1-ի հիշատակի օրը սեփականացնել, մի բան, որի սեփականատերը գոնե մինչ երեկ համարվում էր ՀԱԿ-ն ու Տեր-Պետրոսյանը, պատկերավոր ասած։ Սա աչքի առաջ ունենալով, կարելի է մտածել, որ Տեր-Պետրոսյանը պարզապես իր չմասնակցությամբ հասկացրել է, որ Փաշինյանի՝ իր «սեփականության տիրույթ» նման բռի ներխուժումից վիրավորված է։

Թեև կարող է նաև այլ պատճառ էլ լինել, ինչպես, օրինակ, այն, որ Տեր-Պետրոսյանը ցածր համարի իր պատվից այսպես ասած մասնակցել իր քաղաքական երկունքի պտուղ հանդիսացողի հովանու ներքո կազմակերպված ցույցին։ Ի վերջո, որքան էլ Փաշինյանն ունենա վարկանիշ և այլն, նա այլ կատեգորիա չէ, քան Լևոն Տեր-Պետրոսյանի քաղաքական պրոդուկտ։

NEWSPRESS.am