Հայկ Մարությանը՝ Մանե Թանդիլյանի հետքերով

NEWSPRESS.am-ը մշտապես իր ուշադրության կենտրոնում է պահել քաղաքապետ Հայկ Մարությանի գործուներությունն ու բազմիցս արձանագրել՝ Հայկ Մարությանը քաղաքապետ աշխատել չի կարող: 

Մեր նախորդ շատ հոդվածներում Հայկ Մարությանին հորդորել ենք թողնել քաղաքապետի պաշտոնն ու զբաղվել այն գործով, որն, իսկապես, իրենն է՝ դերասանությամբ, քանզի վստահ ենք, որ ավելի լավ է լինել և մնալ ստացված դերասան, քան թե չստացված քաղաքապետ:

Հավանաբար, մեր հորդորներն ու քաղաքային իշխանության ծանր բեռն են եղել պատճառը, որ քաղաքապետ Հայկ Մարությանը որոշել է հրաժարական տալ:

Նրա՝ հրաժարականի ցանկության մասին այսօր գրել է 168.am-ը:

Ըստ կայքի տեղեկությունների՝ Հայկ Մարությանը մոտ երկու շաբաթ առաջ դիմել է ՀՀ վարչապետ Նիկոլ Փաշինյանին և հայտարարել, որ ցանկանում է հրաժարական ներկայացնել, սակայն վարչապետը նրան հորդորել է այդ քայլին չգնալ և գոնե երկու ամիս ևս պաշտոնավարել։

Խնդիրը նրանում է, որ քաղաքապետի հրաժարականի դեպքում ավագանու մեծամասնությունն իր միջից պետք է ընտրի նոր քաղաքապետին։

Բնականաբար՝ Հայկ Մարությանին ատամներով պահած Նիկոլ Փաշինյանի համար իր վարկանիշի անկման այս փուլում բացարձակ ձեռնտու չէ Մարությանի հրաժարականը, ուստի վարչապետը նրան համոզել է մնալ և աշխատել: Համոզելը Փաշինյանի մոտ լավ է ստացվում, հիշում ենք, թե մի անգամ էլ ինչպես նա համոզեց մնալ և աշխատել աշխատանքի և սոցիալական հարցերի նախկին նախարար Մանե Թանդիլյանին, ով վարչապետին էր հանձնել իր հրաժարականի դիմումը: Այն, որ համոզել է՝ Փաշինյանը խոստովանեց նաև Կառավարության նիստերից մեկում. Իհարկե, Մանե Թանդիլյանը մնաց և կարճ ժամանակ ևս աշխատեց որպես նախարար, իսկ թե ով է հիմա նա՝ պարզից էլ պարզ է՝ Նիկոլ Փաշինյանին ու նրա թիմին ընդդիմադիր պատգամավոր: 

Այնպես որ, չի բացառվում, որ Հայկ Մարությանը հետևի Մանե Թանդիլյանի օրինակին և կարճ ժամանակ էլ շարունակի մնալ Երևանի քաղաքապետի պաշտոնում, որից հետո էլ դառնա Փաշինյանին ընդդիմադիր ակտիվիստ:

Այս իշխանության պարագայում ոչինչ բացառել հնարավոր չէ. Դավիթ Սանասարյանի ու ՊՎԾ աշխատակիցների հետ կատարվողը վկա…