Տգիտության մարմնացումն ու կործանման եզրին գտնվող մշակույթը

Թավշյա հեղափոխության արդյունքում պետական կառավարման ապարատ խցկված որոշ պաշտոնյաներ, կամա թե ակամա, ջանք ու եռանդ չեն խնայում իրենց տգիտությունն ու անտեղյակությունն ի ցույց դնելու համար։ Ճիշտ է՝ նրանց թվում է, որ նրանք այլևս քաղաքական երկնակամարում վառվող աստղեր են, կարող են աջ ու ձախ հարցազրույցներ տալ՝ առանց գիտակցելու, որ այդ հարցազրույցներից որոշները կարող են ի ցույց դնել իրենց քաղաքական դատարկությունը։

Ասվածի հերթական օրինակը մշակույթի նախարարի պարտականությունները կատարող Նազենի Ղարիբյանն է։ Կայքերից մեկին տված նրա հարցազրույցն ու նրա ասած որոշ անբովանդակ և իմաստազուրկ նախադասություններն իր գլխին փորձանք են դարձել։

Նազենի Ղարիբյանը Aravot.am-ի հետ զրույցում ասել է, որ Համազգային թատրոնը հիմնվել է Սոս Սարգսյանի կուրսի հիմքի, ինստիտուտի ակտիվի հիման վրա, և թատրոնի ժանրային միակ առանձնահատկությունը Սոս Սարգսյանի կողմից հիմնադրված լինելն է, ինչին անդրադարձել է թատրոնի հիմնադիրներից՝ ռեժիսոր, դերասան Դավիթ Հակոբյանը և նշել. «Այնքան ծիծաղելի է, որ նույնիսկ զայրանալու չէ: Այդ կինը (Նազենի Ղարիբյանը- Գ.Հ.) տեղյակ չէ որեւէ բանից: Ես արդեն սկսում եմ մտածել, որ ինքը որևէ ներկայացում ոչ մի տեղ չի էլ նայել, համենայնդեպս, մեր թատրոնի հետ բացարձակապես կապ չունի… Նա նույնիսկ տեղյակ չէ, թե ինչպես է ստեղծվել այս թատրոնը…ասում է՝ ստեղծվել է Սոս Սարգսյանի կուրսի հիման վրա, պատկերացնո՞ւմ եք՝ Շահում Ղազարյանը, Մայիս Ղարագյուզյանը, Գալյա Նովենցը Սոս Սարգսյանի կուրսի ուսանողնե՞րն էին` իր տարիքի …Այդպես անհասկանալի ձևով ինչ-որ ուսանողական թատրոն են բացել, և որովհետև ուսանողական է, պետք է միացնել ինստիտուտի՞ն: Չեմ հասկանում` ի՞նչ է նշանակում սա, ինչի՞ համար է այս ամենը»,-կարդում ենք aravot.am-ում:

Դավիթ Հակոբյանի այս հարցադրումն իրապես դառնում է օրվա հրամայական ու խնդիր, քանի որ նոր իշխանության կադրային սովը սկսում է վտանգավոր դառնալ պետության, իսկ որ ամենավտանգավորն է՝ մշակույթ-պետական հիմք ամուր կապի համար։ 

Ղարիբյանական տեսակներին՝ իրենցից հազարավոր կիլոմետրեր հեռու գտնվող ոլորտներում խցկողները հավանաբար չեն էլ գիտակցել մշակույթին այս կնոջ հասցրած հնարավոր վնասը՝ լուծելով ընդամենը քայլողին պաշտոնով ապահովելու հարցը։

Դեռ հարց է՝ Նազենի Ղարիբյանը կյանքի մեջ գեթ մեկ անգամ այցելե՞լ է որևէ թատրոն, կարդացե՞լ է երբևէ այդ թատրոնի ստեղծման պատմությունը: Վստահաբար՝ ոչ: Հակառակ պարագայում՝ նման խայտառակության առաջ չէր կանգնի։

NEWSPRESS.am