Նիկոլը սկսել է «ժերտվա» տալ իր զինակիցներին

Արարատ Միրզոյանի գլխավորությամբ պառլամենտական պատվիրակության՝ Ռուսաստան այցից հետո կարելի էր նաև սպասել, որ Նիկոլ Փաշինյանը կորոշի հերթական շրջադարձը կատարել և կթիրախավորի իր թիմի այն հատվածին, որին առանձնապես չի վստահում և կարող է նաև, այսպես ասած, «ժերտվա» տալ:

Այս համատեքստում այսօրվա ձերբակալությունները ՊՎԾ-ում կարելի է համարել այդ մարտավարության գործնական կիրառությունը կամ դրա դրսևորումներից մեկը:

Ժամանակին ռուսներին ադապտացնելու կոչ անող, իսկ հետո լրիվ ռուսներին ադապտացված Փաշինյանն այս կերպ փորձում է հաճոյանալ ռուսներին, քանի որ հասկացել է, որ իր իշխանության տևականությունն ուղիղ համեմատական է ռուսներին հաճոյանալուց: Թերևս այս նպատակով է, որ իր ամենահավատարիմ սորոսական զինակիցներին որոշել է ուղարկել Մոսկվա՝ հպատակություն հայտնելու ռուսներին, որի մասին գրել էին, և մաքրելու արևմտամետական պիտակից:

Իսկ ահա Դավիթ Սանասարյանի կառույցում աղմկոտ ձերբակալությունները, որը պարզ ասած օրակարգ է բերում հենց Դավիթ Սանասարյանի հրաժարականի հարցը, այն զոհաբերությունն է, որն արվում է հանուն Կրեմլի բարի ժպիտի: Արդեն կա խոսակցություն, որ Սանասարյանի հրաժարականը հաշված օրերի հարց է: Շատ հետաքրքիր է, թե այս ամենին ինչպես է արձագանքելու Արևմուտքը: Դեռևս կա սպասողական վիճակ, մարդիկ փորձում են հասկանալ, թե ինչն ինչոց է, սակայն, ամենայն հավանականությամբ, Իրան կատարելիք այցից հետո Արևմուտքն՝ ի դեմս ԱՄՆ-ի, իր վճռական խոսքը կասի Փաշինյանին:

Ի վերջո, հետևողական կերպով հարված է հասցվում բոլոր նրանց, որոնց վրա հիմնվում է Արևմուտքը և որոնց մասին որպես անհուսալի արևմտյան գործակալների, արտահայտվել է ռուսական մամուլը ժամանակին:

Եթե անկեղծ ասենք, սա նոր բան չէ: Արդեն Խառատյանի հրաժարականից ի վեր, թեև ասում են այդ հրաժարականի հետ կապված նաև բավական պիկանտ շարժառիթներ են եղել, ով ուղիղ կերպով որակվել է որպես Պետդեպի մարդ հայկական իշխանություններում, սպասելի էր, որ բոլոր նրանք, ում հետ Փաշինյանը դեռ շարունակելու է ճանապարհ անցնել, կաշի են փոխելու, իսկ նրանք, որոնք անբարեհույս են ճանաչվել Մոսկվայի կողմից, գնալու են Աննայի և Նիկոլի բարեկեցության զոհասեղանին որպես զվարակ:

NEWSPRESS.am