Շեղում է գլխավորից

Հայաստանի առաջ ծառացած խնդիրներն ու սոցիալ տնտեսական բարդ իրավիճակը Ալեն Սիմոնյանը մի կողմ է դրել և զբաղված է բացառապես ՀՀ պետական օրհներգի փոփոխության հարցով։

Սիմոնյանը որոշել է այս հարցում մինչև վերջ գնալ և իր անունը ոսկե տառերով գրել տալ իր համար ցանկալի պատին։

Բազմաթիվ քննադատություններից հետո Սիմոնյանը նորից խոսել է օրհներգի փոփոխության անհրաժեշտության մասին՝ հայտարարելով մրցույթ։

ՀՀ Ազգային ժողովի փոխխոսնակը պետական օրհներգի տեքստի մրցույթը հայտարարել է պայմանով․ օրհներգը պետք է գրել Արամ Խաչատրյանի ստեղծագործության հիման վրա:

«Որևիցե մեկին, կարծում եմ, չի անհանգստացնում այն փաստը, որ եռագույնը, որի մասին երգվում է «Մեր Հայրենիք»-ի մեջ, դա իտալական եռագույնն է, որ այդ օրհներգի բառերի մեջ փոփոխութուն ենք արել «թշվառ, անտերը», որպեսզի այն հնչի ավելի լավ: Եվ դա Գլազունովի բալետից վերցված մի մաս է, երաժշտական առումով Հայաստանի հետ որևիցե կապ չունեցող երաժշտություն է»,-իր հանճարեղ գաղափարն էլ ավելի հիմնավորելու համար մեջբերել է Սիմոնյանը։

Պատգամավորի՝ ամեն կերպ ազգին օգուտ տալու ցանկությունն այնքան բուռն է, որ նա ջանք ու եռանդ չի խնայել ու այսօր հպարտ հայտարարում է, որ ստեղծվել է աշխատանքային խումբ, որի կազմում են Ալեն Սիմոնյանը, Տեր Ասողիկ քահանան, Կոմպոզիտորների միության նախագահ Արամ Սաթյանը, Գրողների միության նախագահ Էդվարդ Միլիտոնյանը, Կոմիտասի թանգարանի տնօրեն Նիկոլայ Կոստանյանը, Արամ Խաչատրյանի թանգարանի տնօրեն Արմինե Գրիգորյանը, ակադեմիկոս Հենրիկ Հովհաննիսյանը, գրականագետ Ֆելիքս Բախշյանը, Լեզվի պետական կոմիտեի նախագահ Դավիթ Գյուրջինյանը:

Փաստորեն Սիմոնյանը երկու ոտքը մեկ կոշիկի մեջ մտցրած՝ որոշել է հիմնը փոխել ու լծվել է դրա գործին։

Սա հասարակությանը հիմնական խնդիրներից շեղելու հերթական կեղծ օրակարգն է՝ նետված մամուլին ու ֆեյսբուքին, որի նպատակն օր օրի հասունացող և պայթյունավտանգ դարձող խնդիրները ստվերելն է։ Սա հերթական պոպուլիստական քայլն է նոր իշխանավորների կողմից, որի արդյունքում մենք ունենալու ենք հերոսացող ինչ-որ կերպար՝ զրոյական օգտակար գործողության գործակցով, որովհետև փաստ է այն, որ ՀՀ հպարտ քաղաքացիները Ալեն Սիմոնյանին օրհներգը փոխելու համար չէ , որ ուղարկել են Ազգային ժողով։

Ֆեյսբուքյան անիմաստ լայվերի համար չէ, որ հարկատուները վճարում են աշխատավարձ օրենսդիր մարմնի այս կարկառուն ներկայացուցչին։ Նրան հասարակությունը գործուղել է այնտեղ գործ անելու համար, ինչի հետքն անգամ ամիսներ անց չի երևում։

NEWSPRESS.am